បើគិតមកដល់ពេលនេះ រយៈពេលជិត ១ សប្តាហ៍មកហើយ ដែលតារាស្រី ពេជ្រ ចរណៃ បានជួបគ្រោះធំត្រូវអគ្គិភ័យត្របាក់យកហាងអស់ទាំងស្រុង កាលពីយប់ថ្ងៃទី ១៨ ខែមិថុនា ឆ្នាំ ២០២៥ កន្លងទៅ។
ក្រោយភ្លើងឆេះហាងអស់ កញ្ញា ពេជ្រ ចរណៃ មិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងទ្វេដង ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញ។
ក្រោយពីជួបព្យុះភ្លៀងជីវិតលើកនេះហើយ កញ្ញា ពេជ្រ ចរណៃ ក៏ត្រូវបានមហាជន និង មិត្តទាំងក្នុង ក្រៅសិល្បៈជាច្រើនបានចូលរួមចំណែកជួយដល់នាងជាថវិកាខ្លះៗផងដែរ ប៉ុន្តែបើទោះជាមានការជួយជាបន្តបន្ទាប់ក្តី កញ្ញា ពេជ្រ ចរណៃ ក៏ត្រូវចំណាយប្រាក់ច្រើនសន្ធឹកទៀត ដើម្បីស្តារឡើងវិញនៃហាង ដែលខូចខាតទៅនោះ។
យ៉ាងណាមិញ អ្វីដែលបានធ្វើឱ្យមហាជនកោតសរសើរដល់កញ្ញា ពេជ្រ ចរណៃ និង លោក រឹទ្ធី រាជស័ក្ត ដែលជាគូស្នេហ៍របស់ កញ្ញា ពេជ្រ ចរណៃ នោះ គឺការមិនបោះបង់ និង ការតស៊ូចាប់ដៃគ្នាជម្នះនូវព្យុះភ្លៀងមួយនេះ។ ក្នុងនោះ គេបានឃើញ កញ្ញា ពេជ្រ ចរណៃ និង លោក រឹទ្ធី រាជស័ក្ត ចាប់ផ្តើមលាងសម្អាត និង ជួសជុលហាង ដែលឆេះនោះបណ្តើរៗវិញហើយ ដោយធ្វើខ្លួនឯងទៀតផង៕
