កាលពីថ្ងៃទី ១៣ ខែមិថុនា ឆ្នាំ ២០២៥ កន្លងទៅនេះ មហាជនអ្នកលេងបណ្តាញសង្គមហ្វេសប៊ុក ជាពិសេសប្រជាជកម្ពុជាជាច្រើនមានការហួសចិត្តយ៉ាងខ្លាំង ក្រោយឃើញតារាប្រុសថៃម្នាក់ឈ្មោះ Tack Pharunyoo បានផុស Status មួយឌឺដងផ្លែផ្កាឱ្យប្រទេសកម្ពុជា ទាក់ទងនឹងករណីជម្លោះព្រុំដែនកម្ពុជា-ថៃ ដែលបានបង្កឡើងពីភាគីប្រទេសខ្លួនឯងមុន។
ជាការពិត តារាប្រុសថៃខាងលើនេះបានផុស Status នៅគណនីរបស់ខ្លួនថា ៖ «យើងចង់ពហិការបិទរបស់នៅប្រទេសឯងដែរ តែប្រទេសឯងមានអ្វីឱ្យពហិការ ក្រៅពីក្រុមឆ.. គិតមិនឃើញថាមានអីខ្លះសោះ»។ រីឯនៅក្រោមខមមិនរូបគេក៏បាននិយាយទៀតថា ៖ «មានអីឱ្យពហិការ? រឿង? ភាពយន្ត? កម្មវិធី? អាហារ? ទេសចរណ៍?»។ លើសពីនេះទៀត រូបគេក៏បាននិយាយបែបឡកឡាយទៀតថា ៖ «នឹកឃើញហើយ របស់ខ្មែរ គឺអ្នកលេងអំពើ»។
ឆ្លើយតបនឹងការបង្ហោះនេះដែរ ក៏មានមហាជនខ្មែរជាច្រើនបានចេញមកបង្ហោះសារប្រតិកម្ម និង ឆ្លើយតបទៅកាន់នោះរូបគេភ្លាមៗ។ អ្វីដែលចាប់អារម្មណ៍ អ្នកគាំទ្រក៏បានឃើញការចេញមកប្រតិកម្មរបស់តារាចម្រៀង អ្នកនាង សុគន្ធ និសា ផងដែរជុំវិញការឌឺដងផ្លែផ្កាអត់ដឹងខ្យល់របស់តារាប្រុសថៃខាងលើ។
អ្នកនាង សុគន្ធ និសា បង្ហោះសារបង្ហាញអារម្មណ៍មិនពេញចិត្តក្នុងនាមជាប្រជាជនខ្មែរមួយរូបថា ៖ «ខ្ញុំមិនដែលគាំទ្រតារាថៃទេ ទទួលស្គាល់ថាពួកគេស្អាតៗ តែខ្ញុំស្អប់តាំងពីយូមកហើយ ព្រោះខ្ញុំឃើញក្រសែភ្នែកមើលងាយខ្មែរណាស់ រូបស្អាតតែចរិតអន់»៕
