ការស្រលាញ់ពេលខ្លះមិនចាំបាច់បញ្ជាក់ជាការនិយាយឬបកស្រាយ អាចឃើញត្រឹមរូបភាព ក៏អាចបង្ហាញពីសម្ពន្ធភាព និង ទំហំចិត្តចំពោះគ្នា។ ជាក់ស្តែង ចំណោមបុរសមានប្រជាប្រិយភាពនៅលើបណ្តាញសង្គម ឃើញថាមហាជនច្រើនតែលួចច្រណែននឹងបុរស ៣ គូ ដែលរាល់ពេលពួកគេបង្ហោះរូបភាពឬវីដេអូ តែងមានគេចូលទៅខមមិន និង Share ជាហូរហែ ដោយគិតថាពួកគេមានភាពស្និទ្ធស្នាលលើសពីមិត្តភក្តិឬជាគូស្នេហ៍ដ៏ផ្អែមល្ហែម។ បុរសទាំង ៣ គូនោះមានដូចជា៖
១. ហេង វាសនា និង Fong-Vee
មួយរយៈក្រោយនេះ ហេង វាសនា ដែលគេស្គាល់ជាបងប្រុស ហេង វិសាល និង កំលោះតូច Fong-Vee មានភាពស្និទ្ធស្នាលប្លែក មើលទៅលើសពីមិត្តធម្មតា។ រាប់តាំងពីការបង្ហោះវីដេអូ និង រូបភាពអ្នកទាំងហាក់កៀកកើយ មើលមកផ្អែមល្ហែមដូចជាគូស្នេហ៍។
២. Steven និង Porheng
លោក Steven ត្រូវបានគេស្គាល់ជាពេទ្យធ្មេញ និង ជាស្ថាបនិកពេទ្យធ្មេញប្រពៃ ចំណែក Porheng ជាអ្នកបង្កើតមាតិកា ជាម្ចាស់ផេកបង្រៀនភាសាថៃ thaibytenn ក៏ដូចជា ផេកលក់ផលិតផលថែរក្សាសុខភាពមាត់ធ្មេញ Smilelab Cambodia ផងដែរ។ ជាយូរណាស់មកហើយ ដែលអ្នកទាំងតែងបង្ហាញភាពស្និទ្ធស្នាល មិនថាការធ្វើវីដេអូបង្ហាញពីជីវិតប្រចាំថ្ងៃ ដំណើរកម្សាន្ត ការងារ ការរកស៊ី ជាពិសេស តែង surprise គ្នាទៅវិញទៅមកក្នុងឱកាសពិសេស។
៣. ប៉េងអាន និង Key
មួយគូនេះ នរណាដែលថាមិនច្រណែន ម្នាក់ៗសុទ្ធតែសង្ហាៗ និង មានភាពខ្លាំងរៀងខ្លួន។ អ៊ុង ប៉េងអាន ជាស្ថាបនិកទំព័រហ្វេសប៊ុក «Think with PingAnn ឬ គិតជាមួយប៉េងអាន» ដែលចែករំលែកចំណេះដឹងតាមរយៈវីដេអូផ្តោតលើប្រធានបទ សុខភាព កម្លាំងចិត្ត និង ចំណេះដឹង។ ហើយលោកក៏ជាសហគ្រិនវ័យក្មេងផងដែរ។ ចំណែក Key មានឈ្មោះពិត អ៊ូ តុងហួរ ជាសិល្បករចម្រៀង, ជាសហស្ថាបនិក វេទិកាអប់រំ DEI Forum Cambodia, ជាសហស្ថាបនិកហាងសម្លៀកបំពាក់ Attire Lounge ហាងកាហ្វេ Cuffeine: Plant-based Coffee និង បណ្ណាល័យ The Reading Lounge Library ដែលបើករកស៊ីជាមួយគ្នានឹងប៉េងអានផងដែរ។ ក្រៅពីបង្កើតមាតិកាវីដេអូជាមួយគ្នានៅលើបណ្តាញសង្គម ជារឿយៗពេលមានដំណើរកម្សាន្តមិនថាក្នុងឬក្រៅប្រទេស អ្នកទាំងពីរតែងបង្ហោះរូបភាពសិទ្ធស្នាល ផ្អែមល្ហែមដូចជាលលកញីឈ្មោលមួយគូដូច្នោះដែរ៕
