បើរំឭកកាលពីប៉ុន្មានឆ្នាំ មហាជនច្បាស់ជានៅចាំនៅឡើយតារាចម្រៀង និង សម្តែងស្រី កញ្ញា ថាច់ ម៉ារី ដែលគ្រប់គ្នាបានស្គាល់នាងច្បាស់ ក្នុងការសម្តែងជាតំណែងជាតួឯកស្រីក្នុងកម្មវិធី «បុណ្យភូមិ» ដល់ទៅ ២ លើក។
លើសពីនោះ កញ្ញា ថាច់ ម៉ារី ក៏បានចូលរួមសម្តែងភាពយន្តជាបន្តបន្ទាប់ ដោយភាពយន្តបែបយុវវ័យទទួលបានការគាំទ្រខ្លាំងនោះ គឺរឿង «Campus Love Story» និង រឿង «ខ្យល់ខែកុម្ភៈ» ជាដើម។
យ៉ាងណាមិញ ប៉ុន្មានឆ្នាំចុងក្រោយនេះម្ចាស់បទ «Love Yourself First» កញ្ញា ថាច់ ម៉ារី កាន់តែស្ងប់ស្ងាត់ខ្លាំងលើវិថីសិល្បៈ ក្រោយពីនាងបានវិលត្រឡប់មកពីសិក្សានៅក្រៅប្រទេស។ ក្នុងនោះ បើទោះជាគេរមែងឃើញនាងចូលរួមកម្មវិធីរបស់អ្នកសិល្បៈ ដែលជាអ្នកស្និទ្ធស្នាលក្តី តែ ថាច់ ម៉ារី ហាក់មិនអើពើវិលចូលវិថីនេះទៀតឡើយ។
ដោយឡែក អ្វីដែលគួរឱ្យសរសើរនោះ កន្លងមក កញ្ញា ថាច់ ម៉ារី ក៏បានបើកទីកន្លែងទទួលមើលថែ និង ចិញ្ចឹមសត្វអនាថារួមមាន សុខន និង ឆ្មា ជាដើម ដោយកន្លែងនោះមានឈ្មោះថា Dirty Paws។ បន្ថែមពីនេះ បច្ចុប្បន្ន កញ្ញា ថាច់ ម៉ារី និង ក្រុមគ្រួសារ បានបង្កើតអាជីវកម្មផ្ទាល់ខ្លួន ក្នុងការមើលថែសុនខ និង ឆ្មា ផង។ មិនត្រឹមតែប៉ុណ្ណោះ នាងក៏បានចំណាយប្រាក់ផ្ទាល់ខ្លួនមើលថែសត្វអនាថាជាច្រើនក្បាលទៀតដែរ៕
