មហាជនអ្នកគាំទ្រតាមដានជីវិតឯកជនរបស់តារាចម្រៀងប្រុសល្បីឈ្មោះ ខេម សុទ្ធសឹងតែជ្រាបហើយពីជីវិតស្នេហារបស់លោក ដោយមកដល់ពេលនេះ រយៈពេលជាង ៤ ឆ្នាំមកហើយ ដែលតារាចម្រៀងប្រុសរូបនេះបានបើកបង្ហាញមុខម្ចាស់បេះដូងជាស្រីស្អាតរូបស្រស់អ្នករស់នៅប្រទេសបារាំង បណ្ដើរគ្នាពេញមុខពេញមាត់ ក្រោយទាក់ទងមើលចិត្តគ្នាជាច្រើនឆ្នាំ។
យ៉ាងណាមិញ ក្រោយបង្ហាញជាសាធារណៈពីទំនាក់ទំនងស្នេហា កន្លងមក ខេម និង គូស្នេហ៍ ត្រូវបានមហាជនភាគច្រើនដឹងថាទាក់ទងគ្នាក្នុងនាមជាគូដណ្ដឹង ដោយមិនទាន់លេចឮដំណឹងពីការរៀបចំកម្មពិធីមង្គលឡើយ ប៉ុន្តែក៏ត្រូវបានគេដឹងថាអ្នកទាំងពីរបានក្លាយជាប្ដីប្រពន្ធស្របច្បាប់រួចហើយដែរ គ្រាន់តែមិនដែលបង្ហាញជាសាធារណៈប៉ុណ្ណោះ។
ដោយឡែក អ្វីកាន់តែចាប់អារម្មណ៍ចំពោះគូស្នេហ៍មួយគូនេះ មកដល់ថ្ងៃទី ៦ ខែកុម្ភៈ ឆ្នាំ ២០២៥ កន្លងទៅនេះ ទើបដឹងថាតាមពិតអ្នកទាំងពីរបានរួមរស់ប្រើឈ្មោះជាស្វាមីភរិយានឹងគ្នារយៈពេល ៩ ឆ្នាំមកហើយ ក្រោយពីបានឃើញមិត្តភក្តិបងប្អូនរៀបចំកម្មវិធីអបអរខួបអាពាហ៍ពិពាហ៍គម្រប់ខួប ៩ ឆ្នាំឱ្យ ខេម និង ភរិយាសំណព្វចិត្តរបស់លោកពោរពេញដោយភាពផ្អែមល្ហែម៕
