មិនធម្មតា! ស្ត្រីពីររូប ខ្លាំងទាំងតំណែង ទាំងការរកស៊ី ស្ថិតក្នុងចំណោមឧកញ៉ាល្បីៗជួរមុខនៅកម្ពុជា

តាមរយៈគេហទំព័រ សមាគមឧកញ៉ាកម្ពុជា ខណៈដែលសមាជិកភាពនៃសមាគមភាគច្រើនជាបុរស ក្នុងនោះក៏សម្គាល់ឃើញថា មានស្ត្រីពីររូប ដែលមានតួនាទីធំជា អនុប្រធានសមាគមផងដែរ នោះគឺ លោកអ្នកឧកញ៉ា ហុង ស៊ួន ស៊ីគង់ទ្រីវ  និង អ្នកឧកញ៉ា អ៊ាន  អេឡែន។ ក្រៅពីមានតួនាទីមិនចាញ់ឧកញ៉ាល្បីៗដែលជាបុរស ទន្ទឹមគ្នានេះ លោកអ្នកឧកញ៉ា និង អ្នកឧកញ៉ា ទាំងពីររូបក៏ជាពាណិជ្ជករដ៏ឆ្នើម និង លេចធ្លោនៅកម្ពុជាផងដែរ។

១. លោកអ្នកឧកញ៉ា ហុង ស៊ួន ស៊ីគង់ទ្រីវ 

លោកអ្នកឧកញ៉ា ហុង ស៊ួន ស៊ីគង់ទ្រីវ មានតួនាទីជាអនុប្រធានសមាគមឧកញ៉ាកម្ពុជា។ លោកអ្នកឧកញ៉ាកើតក្នុងឆ្នាំ១៩៥៤ ហើយបានចូលប្រឡូកក្នុងវិស័យជំនួញអស់រយៈកាលជាច្រើនទសវត្សរ៍មកហើយ។ បច្ចុប្បន្ន លោកអ្នកឧកញ៉ា ហុង ស៊ួន មានតួនាទីជាអគ្គនាយិកាក្រុមហ៊ុន KT Pacific Group Limited ដែលជាក្រុមហ៊ុនអាហរ័ណនីហរ័ណ និងជាប្រធានក្រុមប្រឹក្សាភិបាលក្រុមហ៊ុន Battambang Conch Cement Company ដែលជារោងចក្រផលិតស៊ីម៉ង់ត៍ដ៏ធំមួយនៅក្នុងព្រះរាជាណាចក្រកម្ពុជា និង ត្រូវបានវិនិយោគក្នុងទំហំទឹកប្រាក់រាប់រយលានដុល្លារអាម៉េរិក។

ក្រៅពីនេះ លោកអ្នកឧកញ៉ា និង ស្វាមីគឺ លោកអ្នកឧកញ៉ា ស៊ី គង់ទ្រីវ ដែលជាពាណិជ្ជករលេចធ្លោមួយរូបនៅកម្ពុជា ក៏មានមុខជំនួញជាច្រើនផ្សេងទៀតដូចជា អគារពាណិជ្ជកម្មម៉ុងឌីយ៉ាល់, ផ្សារនាគមាស ដែលកំពុងលក់ និង ចែកចាយទំនិញដ៏ធំមួយនៅកណ្តាលរាជធានីភ្នំពេញ, ក្រុមហ៊ុនអភិវឌ្ឍន៍អចលនទ្រព្យ KT Property Development, ក្រុមហ៊ុន President Foods (Cambodia) ព្រមទាំងអាជីវកម្មជាច្រើនទៀតលើវិស័យសណ្ឋាគារ និងបដិសណ្ឋារកិច្ច ក៏ដូចជាតំបន់សេដ្ឋកិច្ចពិសេសជាដើម។

២. អ្នកឧកញ៉ា អ៊ាន  អេឡែន

អ្នកឧកញ៉ា អ៊ាន  អេឡែន មានតួនាទីជាអនុប្រធានសមាគមឧកញ៉ាកម្ពុជា។ អ្នកឧកញ៉ាកើតនៅក្នុងឆ្នាំ ១៩៧៤ និង បានចូលប្រឡូកក្នុងវិស័យជំនួញអស់រយៈកាលជាច្រើនឆ្នាំមកហើយ។ បច្ចុប្បន្ន អ្នកឧកញ៉ាគឺជាប្រធានប្រតិបត្តិនៃសណ្ឋាគារ សែន ហាន (Sen Han Hotel) ព្រមទាំងជាពាណិជ្ជករស្ត្រីដ៏ឆ្នើមមួយរូប ដែលកំពុងវិនិយោគលើពហុវិស័យ ក្នុងនោះក៏មានគម្រោង តាមោក ស៊ីធីលែន (Tamork City Land)  ដែលជាក្រុមហ៊ុនអភិវឌ្ឍន៍អចលនទ្រព្យ និង សាងសង់បុរីដ៏ធំមួយផងដែរ៕