ពិតណាស់ ថ្មីៗនេះ កម្មវិធីប្រកួតសម្រស់កម្ពុជា Miss Supranational Cambodia 2025 បានបើកដំណើរការប្រកួតជ្រើសរើសបេក្ខភាពជាផ្លូវការហើយ ដើម្បីស្វែងរកម្ចាស់រាជិនីគ្រងមកុដ Miss Supranational Cambodia ប្រចាំឆ្នាំ ២០២៥ នេះ។
ស្របពេលកំពុងដំណើរការប្រកួតនេះដែរ មហាជនកំពុងក្រឡេកចាប់អារម្មណ៍មើលទៅបេក្ខភាពនីមួយៗដែលសុទ្ធសឹងតែមានរូបសម្រស់ស្រស់ស្អាត ព្រមទាំងមានសមត្ថភាពទេពកោសល្យ និង ចំណេះដឹងរៀងៗខ្លួន។
ពេលនេះដែរ កម្មវិធីប្រកួត Miss Supranational Cambodia 2025 ក៏បានឈានដល់វគ្គ Supra Gate Audition ជាវគ្គដែលបេក្ខភាពនីមួយៗបង្ហាញខ្លួនលើកដំបូង និង មានការសម្ភាសជ្រើសរើសជាបេក្ខភាពផ្លូវការនៃកម្មវិធី។
ក្នុងវគ្គនេះដែរ អ្វីកាន់តែធ្វើឱ្យមហាជនអ្នកគាំទ្រវិស័យបវរកញ្ញាចាប់អារម្មណ៍ ខណៈបានឃើញកម្មវិធីប្រកាសពីបេក្ខភាពបវរកញ្ញា ២ រូប មានភាពលេចធ្លោខ្លាំង ដែលត្រឹមវគ្គបង្ហាញខ្លួនដំបូងនេះ អ្នកទាំងពីរក៏ឆក់បានពានម្នាក់ ១ ទៅហើយ។ បេក្ខភាពទាំង ២ រូបនេះ មានកញ្ញា ឈុំ ចាន់ដារ៉ា ទទួលបានពាន Miss Supra Social Media Vote ដែលមានការស្រឡាញ់គាំទ្រលើបណ្ដាញសង្គមច្រើនជាងគេ និង កញ្ញា Sydney Marith ទទួលបានពាន Miss Supra Best Interview ដែលបានធ្វើការសម្ភាសជាមួយគណៈកម្មការបានល្អជាងគេ៕
