មហាជននិយមតាមដានវិស័យប្រកួតបវរកញ្ញា ច្បាស់ជាបានស្គាល់រួចមកហើយកម្មវិធីប្រកួតបវរកញ្ញាថ្មីសន្លាង ដែលបង្កើតឡើងដោយកូនខ្មែរ «Miss Mera Cambodia» មាន National Director គឺកញ្ញា ខាត់ ស្រីចាន់ អតីត Miss Grand កំពង់ឆ្នាំង ២០២១ និង ជាលំដាប់រងទី ៤ Miss Grand Cambodia 2021 ព្រមទាំងលោក វឌ្ឍនា ភានិត ជា Vice President។
ក្នុងនោះដែរ បន្ទាប់ពីបានរកឃើញបេក្ខជនប្រកួតផ្លូវការចំនួន ១៦ នាក់រួចរាល់ហើយនោះ កម្មវិធី Miss Mera Cambodia បានបន្តដំណើរនៃការប្រកួតអស់រយៈពេលជាច្រើនខែ ដោយកាលពីថ្ងៃទី ០៣ ខែធ្នូ ឆ្នាំ ២០២៤ កម្មវិធី Miss Mera Cambodia បានរកឃើញម្ចាស់មកុដដំបូងហើយ គឺបានទៅលើកញ្ញា ថាន រតនា។
ងាកទៅកាន់ម្ចាស់មកុដដំបូងគេបំផុតក្នុងកម្មវិធី Miss Mera Cambodia គឺកញ្ញា ថាន រតនា ឯណោះវិញ មហាជននិយមតាមដានទស្សនាវិស័យបវរកញ្ញាច្បាស់ជាជ្រាបហើយថា មុននឹងក្តោបបានមកុដ Miss Mera Cambodia 2024 បវរកញ្ញារូបនេះ ក៏ជាលំដាប់រងទី ២ នៃកម្មវិធី Miss Teen International Cambodia 2023 ផងដែរ។
លើសពីនោះ ក្រោយពីទទួលបានតំណែងជាលំដាប់រងទី ២ នៃកម្មវិធី Miss Teen International Cambodia 2023 ហើយ កញ្ញា ថាន រដ្ឋា ក៏ជាបេក្ខជន Top មួយរូប ក្នុងការប្រកួត Miss Grand កំពង់ឆ្នាំ 2023 ទៀតផង៕
