និយាយពីជីវិតឯកជនរបស់បវរកញ្ញាចក្រវាលឆ្នាំ ២០២១ ងិន ម៉ារ៉ាឌី មកដល់ពេលនេះ រយៈពេលជាង ៣ ឆ្នាំហើយ ដែលនាងបានលាភាពនៅលីវរៀបការសាងគ្រួសារជាមួយស្វាមីអាណិកជនអាមេរិករូបសង្ហា និង ទទួលបានកូនស្រីដ៏គួរឱ្យស្រឡាញ់ម្នាក់ជាចំណងដៃអាពាហ៍ពិពាហ៍។
ចាប់តាំងពីសម្រេចចិត្តសាងជីវិតគ្រួសារកន្លងមក ងិន ម៉ារ៉ាឌី ត្រូវគេចាប់អារម្មណ៍ឃើញថានាងទទួលបានក្ដីសុខសុភមង្គលយ៉ាងពេញលេញ និង មានភាពកក់ក្ដៅខ្លាំង ដែលមានស្វាមីពូកែយល់ចិត្ត គោរពស្រឡាញ់ មើលថែយកចិត្តទុកដាក់ខ្លាំងចំពោះនាង។
លើសពីនេះ ដ្បិតតែមួយរយៈក្រោយ អ្នកនាង ងិន ម៉ារ៉ាឌី បានវិលត្រឡប់មកបំពេញការងារសិល្បៈ និង វិស័យបវរកញ្ញាវិញមែន ប៉ុន្តែនាងក៏ធ្លាប់បង្ហើបប្រាប់ទាក់ទងនឹងរឿងជីវិតឯកជន ដែលពេលនេះកំពុងត្រៀមខ្លួនចេញទៅរស់នៅក្រៅប្រទេសជាមួយគ្រួសារស្វាមី និង ចាប់អាជីពថ្មីមួយនៅទីនោះទៀតផង។
ដោយឡែក ក្រោយពីបង្ហើបរឿងត្រៀមខ្លួនចេញទៅរស់នៅក្រៅប្រទេស និង ចាប់អាជីពថ្មីមួយ ថ្មីៗនេះ អ្វីកាន់តែចាប់អារម្មណ៍ចំពោះជីវិតឯកជនរបស់បវរកញ្ញា ងិន ម៉ារ៉ាឌី ទៀត ខណៈបានឃើញអ្នកនាងបង្ហាញក្ដីរំភើបចំពោះការខិតខំសម្រេចក្ដីស្រមៃរបស់ខ្លួន ដែលអ្នកនាងបានរៀនជំនាញថ្មីដ៏ពេញនិយមមួយទាក់ទងនឹងវិស័យក្រចក គឺជំនាញធ្វើក្រចកបានយ៉ាងល្អ និង ជោគជ័យទទួលបានវិញ្ញាបនបត្របញ្ជាក់ការសិក្សារថែមទៀត។
ក្នុងនោះ អ្នកនាង ងិន ម៉ារ៉ាឌី បានរៀបរាប់ថា ៖ «មនុស្សស្រីពូកែ តែងតែពើងទ្រូងជម្នះគ្រប់ឧបសគ្គដោយខ្លួនឯង ហើយនាងមិនបណ្ដោយឱ្យនរណាម្នាក់មក បញ្ឈប់នាងពីក្តីស្រមៃរបស់នាងនោះទេ គ្មានថ្ងៃដែលនាងត្រូវបណ្ដោយឱ្យខ្លួនឯងល្ងង់ ទន់ខ្សោយ គ្មានភាពឯករាជ្យនោះដែរ។ វិន័យ អំណត់ និងគោលដៅជាពាក្យដែលអ្នកគ្រូធំតែងតែលើកមករំលឹកសិស្សគ្រប់ពេលហើយ ទីបំផុតខ្ញុំអាចធ្វើវាបានហើយ ការតស៊ូ ព្យាយាម ដើរទៅមុខនៅលើវិស័យក្រចកនេះ ធ្វើឱ្យខ្ញុំក្លាយជាមនុស្សម្នាក់ដែលអាចយកឈ្នះ ការលំបាកលើអ្វីៗដែលថ្មី មានភាពអត់ធ្មត់កាន់តែខ្លាំង។ អរគុណអ្នកគ្រូទាំងអស់ដែលបានបង្រៀន និង លើកទឹកចិត្តខ្ញុំគ្រប់ពេល អរគុណ លោកប្តីជាពិសេសម្រាប់ការផ្តល់ជាកម្លាំងចិត្តគាំទ្រអូនរហូតមក អរគុណ គ្រួសារដូចគ្នា ដែលតែងតែមានមោទនភាពលើក្មេងស្រីម្នាក់នេះ អរគុណខ្លួនឯងដែលតែងតែជឿជាក់លើខ្លួនឯងរហូតមក។ #សិស្សTheQueenNail ជំនាន់ ទី 18 # ស្នាមញញឹមនៃក្តីសង្ឈឹម»៕
