មកដល់ពេលនេះ កម្មវិធីប្រកួតសម្រស់ Miss Cosmo Cambodia 2025 បានបើកដំណើរការប្រកួតហើយ ដែលកាលពីថ្ងៃទី ៩ ខែមីនា ឆ្នាំ ២០២៥ កន្លងទៅ កម្មវិធីបានរៀបចំជួបជុំបើកបង្ហាញមុខបេក្ខភាពបវរកញ្ញា MCC 2025 ជាផ្លូវការ និង ត្រៀមរៀបចំកម្មវិធីបំពាក់ឈៀងនៅថ្ងៃទី ១៣ ខែមីនា ឆ្នាំ ២០២៥ នេះ។
ស្របពេលកម្មវិធីបើកបង្ហាញមុខបេក្ខភាពជាផ្លូវការនេះដែរ មហាជនកំពុងក្រឡេកចាប់អារម្មណ៍មើលទៅបេក្ខភាពនីមួយៗ ដែលសុទ្ធសឹងតែមានរូបសម្រស់ស្រស់ស្អាត ព្រមទាំងមានសមត្ថភាព និង ចំណេះដឹងរៀងៗខ្លួន។
អ្វីដែលធ្វើឱ្យមហាជនអ្នកគាំទ្រវិស័យបវរកញ្ញាកាន់តែចាប់អារម្មណ៍ទៀត ក្នុងចំណោមបេក្ខភាពផ្លូវការទាំង ២៥ រូបនេះ ក៏ឃើញមានវត្តមានរបស់ម្ចាស់មកុដ Miss Intercontinental Cambodia 2024 កញ្ញា ផន ស្រីពី បានក្លាយជាបេក្ខភាពប្រកួតក្នុងកម្មវិធី Miss Cosmo Cambodia 2025 នេះដែរ។
បើនិយាយពីកញ្ញា ផន ស្រីពី អាចចាត់ទុកជាបរវកញ្ញាដ៏លេចធ្លោ និង មានបទពិសោធន៍មួយរូប ដែលទើបតែបានបញ្ចប់បេសកម្មលើឆាកអន្តរជាតិកាលពីចុងឆ្នាំ ២០២៤ កន្លងទៅ ដោយកញ្ញាបានតំណាងកម្ពុជាក្នុងនាមជា Miss Intercontinental Cambodia 2024 ចូលរួមប្រកួតកម្មវិធីអន្តរជាតិ Miss Intercontinental 2024 នៅឯប្រទេសអេហ្ស៊ីប និង បានឈានជើងចូល Top ២២ ចុងក្រោយនៃកម្មវិធីទៀតផង៕
