បើគិតមកដល់ពេលនេះ រយៈពេល ៣ ឆ្នាំមកហើយ ដែលតារាចម្រៀង អ៊ីវ៉ា បានបង្ហាញពីទំនាក់ទំនងស្នេហាជាមួយនឹងគូស្នេហ៍ ដែលគេបានស្គាល់ជាលោក លី សេងហួរ ម្ចាស់ក្លឹបបាល់ទាត់សៀមរាប យូណាធីត បន្ទាប់ពីអ្នកទាំង ២ បានទាក់ទងគ្នាបែប Private អស់រយៈពេល ៧ ឆ្នាំ។ ជាក់ស្តែង មកទល់ឆ្នាំ ២០២៥ នេះ កញ្ញា អ៊ីវ៉ា និង អនាគតកូនកំលោះក៏បានទាក់ទងគ្នាបានប្រមាណជា ១០ ឆ្នាំ ហើយ។
ជាការពិតណាស់ បើទោះជាចំណងស្នេហ៍កាន់តែចងច្រើនឆ្នាំក្តី តែកញ្ញា អ៊ីវ៉ា ក៏មិនទាន់បង្ហើបពីដំណឹងល្អថានឹងដឹកដៃអនាគតកូនកំលោះចូលរោងជ័យនាពេលណាដែរ ខណៈតារាចម្រៀងស្រីរូបនេះ កំពុងសម្រុកក្នុងការងារសិល្បៈ ជាពិសេសគឺការរកស៊ីរបស់នាងយ៉ាងខ្លាំង។ ក្នុងនោះ ពីមួយថ្ងៃទៅមួយថ្ងៃ កញ្ញា អ៊ីវ៉ា បានពង្រឹងអាជីវកម្មរបស់ខ្លួនកាន់តែខ្លាំងក្នុងនាមជាថៅកែស្រីវ័យក្មេងទៀតផង។
ដោយឡែក បើទោះជាមិនទាន់បានប្រាប់ពីដំរួយថ្ងៃរៀបការក្តី ប៉ុន្តែក្រឡេកទៅមើលជីវិតគូរបស់កញ្ញា អ៊ីវ៉ា និង លោក លី សេងហួរ ម្ចាស់ក្លឹបបាល់ទាត់សៀមរាប យូណាធីត ឯណោះវិញ កាន់តែផ្អែមល្ហែមពីមួយថ្ងៃទៅមួយថ្ងៃ ដោយមួយរយៈក្រោយនេះ គេបានឃើញកញ្ញា អ៊ីវ៉ា រមែងបង្ហោះរូបជាគូជារឿយៗនៅលើគណនី និង ផេកហ្វេសប៊ុកផ្លូវការរបស់នាងថែមទៀតផង៕
