និយាយដល់តារាសម្ដែងប្រុសរូបសង្ហា សេង មង្គល កន្លងមកតែងត្រូវបានមហាជនអ្នកគាំទ្រលើកសរសើរដល់រូបលោក ទាំងសមត្ថភាពទេពកោសល្យផ្នែកសិល្បៈដ៏ប៉ិនប្រសប់ និង មានរូបរាងស្រស់សង្ហាទាក់ទាញមិនធម្មតា ជាពិសេសពេលលោកបង្ហាញរូបភាពដោះអាវបញ្ចេញសាច់ដុំធំៗម្ដងៗ។
ដ្បិតតែ មួយរយៈចុងក្រោយនេះ តារាប្រុសដ៏មានប្រជាប្រិយភាពរូបនេះ មិនសូវបង្ហាញមុខលើវិស័យសិល្បៈដូចមុនមែន ប៉ុន្តែលោកតែងឆក់ការចាប់អារម្មណ៍ពីអ្នកគាំទ្រលើបណ្ដាញសង្គម ដែលជារឿយៗតែងបង្អួតរូបសម្រស់របស់ខ្លួនលើហ្វេសប៊ុក បញ្ចេញសាច់ដុំកង់ៗណែនប៉ែះ ជាមួយនឹងមុខមាត់ដ៏ស្រស់សង្ហាមានមន្តស្នេហ៍ ធ្វើឱ្យរំជួលដល់បេះដូងអ្នកគាំទ្រមិត្តនារីៗមិនតិចនោះទេ។
យ៉ាងណា បើក្រឡេកមើលជីវិតឯកជនវិញ លោក សេង មង្គល កំពុងសំងំចាយជីវិតផ្ទាល់ខ្លួនយ៉ាងរីករាយហាយសូរ រីឯរឿងស្នេហាក៏ពុំធ្លាប់ឃើញលោកបង្ហើប ឬគិតខ្វល់ខ្វាយចង់មានគូជីវិតសាងគ្រួសារនៅឡើយដែរ ដោយភាគច្រើនតែងឃើញលោកបង្ហាញសកម្មភាពដំណើរកម្សាន្តផ្សេងៗជាលក្ខណៈក្រុមគ្រួសារមានប៉ាម៉ាក់ បងប្អូនប៉ុណ្ណោះ។
តួយ៉ាង ថ្មីៗនេះ លោក សេង មង្គល កាន់តែធ្វើឱ្យមហាជនអ្នកគាំទ្រចាប់អារម្មណ៍ខ្លាំង ក្រោយពីបានឃើ់ញលោកបង្ហោះបង្ហាញពីជីវីតឯកជនរបស់ខ្លួន ដែលលោកកំពុងសាងសងផ្ទះមួយយ៉ាងធំទុកសម្រាប់ជូនប៉ាម៉ាក់ និង ជីដូន រស់ជុំគ្នាក្នុងជីវិតសាមញ្ញមួយទៀតផង៕
