មិនត្រឹមជាសិល្បករពហុជំនាញ Ting Tong ក៏មានតួនាទីសំខាន់ផ្នែកព័ត៌មាន នៅក្រសួងការពារជាតិ

មហាជននិយមតាមដានវិស័យសិល្បៈ ច្បាស់ជាបានជ្រាបមកហើយពីទេពកោសល្យរបស់លោក ឈិត សុវណ្ណនិមិត្ត ហៅ Ting Tong ដែលត្រូវបានចាត់ទុកថា ជាសិល្បករពហុជំនាញ ដោយលោកមិនត្រឹមតែជាតារាសម្តែង និង តារាចម្រៀងសម័យនោះទេ តែលោកក៏ជាសិល្បករបុរាណមួយរូបផងដែរ។

លើសពីនោះ បើក្រឡេកទៅមើលក្រុមគ្រួសាររបស់ លោក Ting Tong ឯណោះវិញ គឺសុទ្ធសឹងតែជាឈាមជ័រអ្នកសិល្បៈតាំងពីលោកតា រហូតមកដល់ឪពុកម្តាយ។ ក្នុងនោះដែរ អ្នកម្តាយរបស់លោក Ting Tong ជាអ្នកចម្រៀងបុរាណ និង ជាពិធីការិនីព័ត៌មានប្រចាំទូរទស្សន៍ខេមរភូមិន្ទប៉ុស្តិ៍លេខ ៥ គឺលោកស្រី អោម សុដានី រីឯលោកឪពុក ក៏ជាសិល្បករបុរាណដែរ។

ជាការពិតណាស់ ទន្ទឹមនឹងងារជាសិល្បករពហុជំនាញ កន្លងមក លោក Ting Tong បានបង្ហាញស្នាដៃជាច្រើនទាំងក្នុងខ្សែភាពយន្ត និង ចម្រៀងបុរាណ សម័យទទួលបានការគាំទ្រយ៉ាងខ្លាំងពីមហាជន។ ម្យ៉ាងវិញទៀត ក្រៅពីអាជីពជាតារាសម្តែង និង តារាចម្រៀង លោក Ting Tong ក៏ជាពិធីករព័ត៌មានដូចអ្នកម្តាយដែរ។ បច្ចុប្បន្ន ក្នុងអាជីពជាពិធីករ លោក Ting Tong  ក៏មានតួនាទីជាជំនួយការផ្នែកទូរទស្សន៍របស់នាយកដ្ឋានព័ត៌មាននៃក្រសួងការពារជាតិ ក្នុងនាមជាអ្នកអត្ថាធិប្បាយ និង អ្នកអានព័ត៌មានផងដែរ។

ងាកមកកាន់វិស័យចម្រៀងឯណោះវិញ បើទោះជាមានភាពមមាញឹកក្នុងការងារជាច្រើនក្តី តែតារាចម្រៀងពហុជំនាញរូបនេះ ក៏មិនភ្លេចឆ្លើយតបទៅកាន់អ្នកគាំទ្រ ដែលកំពុងរង់ចាំស្នាដៃថ្មីរបស់លោកនោះឡើយ ដោយលោកទើបបញ្ចេញចម្រៀងជាបន្តបន្ទាប់រួមមានបទ «ពួតដៃ» និង បទ «ចាប់ពីពេលនេះទៅ»៕