នៅថ្ងៃទី ៥ និង ទី ៦ ខែមេសា ឆ្នាំ ២០២៥ នេះ សប្តាហ៍ទី ១ នៃមហោស្រព «បុណ្យភូមិ» បានមកដល់ហើយ ដោយរៀបចំនៅផ្សារទំនើប ជីបម៉ុង ២៧១ មេហ្គា ម៉ល។ ក្នុងនោះ ថ្ងៃដំបូង ពោលគឺនៅថ្ងៃទី ៥ ខែមេសា មហោស្រព «បុណ្យភូមិ» នឹងមានការបង្ហាញនូវផ្ទាំងទស្សនីភាព ល្ខោនខ្មែរចំនួន ៣ ទម្រង់ ដែលមកពី ៤ ក្រុមផ្សេងគ្នា ដោយក្នុងនោះរួមមាន «ល្ខោនពោលស្រីខេត្តកណ្តាល», «ល្ខោនខោលវត្តស្វាយអណ្តែត», «ល្ខោនយីកេកួយខេត្តកំពង់ធំ» និង «ល្ខោនយីកេ នីពេជខេត្តកំពង់ធំ» ជាសម្បត្តិបេតិកភណ្ឌអរូបី ដែលត្រូវការពារជាបន្ទាន់។
ដោយឡែក ថ្ងៃទី ០៦ ខែមេសា ឆ្នាំ ២០២៥ មហោស្រពសិល្ប: «បុណ្យភូមិ» នឹងរៀបចំការប្រគំតន្រ្តី ដែលមានសិល្បករល្បីៗប្រចាំប្រទេសកម្ពុជាចូលរួម ដូចជា កំពូលតារាចម្រៀង ឱក សុគន្ធកញ្ញា, រាជិនីសំឡេង ម៉េង កែវពេជ្រចិន្តា និង កូនស្រី អូនផ្អែម, សិល្បករភ្លើងគប់ រួមមាន កេសរ, ឆាឆា, សយ សេងហួរ, រ៉ក់ស្ស៊ី, និង ចេនី ផងដែរ។
ជាការពិតណាស់ ការសម្តែងល្ខោន និង ការប្រគំតន្ត្រី តែងតែមានជារៀងរាល់ឆ្នាំក្នុងមហោស្រព «បុណ្យភូមិ» ប៉ុន្តែបើដឹងពីមូលហេតុច្បាស់នៃការរៀបចំខាងលើនេះ ទើបយើងដឹងច្បាស់ថា ការរៀបចំនេះគឺធ្វើឡើងយ៉ាងពិសេស សម្រាប់លើកស្ទួយជួយដល់សិល្បករខ្មែរ។
កញ្ញា លំអរពេជ្រ រិទ្ធី សហស្ថាបនិកមហោស្រពសិល្ប:បុណ្យភូមិ បានលើកឡើងថា៖ «សិល្បករសម័យ ដែលចូលរួមក្នុងការប្រគំតន្រ្តីសុទ្ធតែផ្តល់នូវកញ្ចប់ពិសេស ដើម្បីចូលរួមផ្សព្ធផ្សាយសិល្ប:ខ្មែរ។ ដោយសិល្ប:បុរាណ អ្នករៀបចំមហោស្រពសិល្ប:បុណ្យភូមិ បានផ្តល់ជូននូវតម្លៃថវិការពេញថ្លៃ ដោយមិនមានការសុំបញ្ចុះតម្លៃនោះទេ»។
លំអរពេជ្រ បានបញ្ចាក់ថា៖ «តម្លៃសម្តែងល្ខោនក្នុងមួយក្រុមៗអាចខ្ពស់ ប៉ុន្តែបើចែកចាយជាចំណែកតូចៗ ដែលមានគ្រូដឹកនាំ គ្រូភ្លេង សិល្បករ សិល្បការិនីសម្តែង ក្រុមល្ខោនមួយៗ គឺទទួលបានកម្រៃមិនសូវច្រើននោះទេ។ ដូច្នេះ រាល់ក្រុមល្ខោនសម្តែងនៅ បុណ្យភូមិ គឺមិនមានការតវ៉ាតម្លៃសម្តែងនោះទេ»៕
