ក្នុងរដូវវស្សា មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ កាន់តែចង់ទៅទស្សនាកម្សាន្តទឹកដីប្រាសាទអង្គរ ត្បិតថ្មីៗនេះ មានការផ្ទុះចែករំលែកបន្តគ្នាព្រោងព្រាតអំពី រូបចម្លាក់មួយចំនួននៅខេត្តសៀមរាប ដែលក្រោយពីត្រូវស្លែដុះពីលើ បានបង្កើតទៅជាសោភ័ណ្ឌភាព ប្រៀបដូចទៅនឹងសក់មនុស្ស ស្រស់ស្អាតក្រៃលែង កម្របានឃើញនាពេលកន្លងមក។
បើតាមការឱ្យដឹងពីមគ្គទេសក៍ទេសចរប្រកបដោយទេពកោសល្យផ្ដល់នូវប្លង់រូបភាពស្អាតៗ នៅខេត្តសៀមរាប លោក ញឹម ស៊ីដេត បានបង្ហាញពីរូបភាពស្អាតៗជាច្រើន នៃរូបចម្លាក់មួយចំនួន មានស្លែដុះជុំវិញ បង្កើតបានជាឈុតសម្លៀកបំពាក់បៃតងបែបធម្មជាតិ នារដូវធ្លាក់ភ្លៀងនេះ ដែលលោកបានបញ្ជាក់ឱ្យដឹងថា ទិដ្ឋភាពទាំងនេះគឺមានពីរទីតាំង ដែលប្រិយមិត្តអាចទៅទស្សនាបាន នោះគឺស្ថិតនៅ ខ្លោងទ្វារខ្មោចមួយទីតាំង និង មួយទីតាំងទៀត ស្ថិតនៅប្រាសាទបាលិលេយ្យ។
គួរឱ្យដឹងផងដែរថា ក្រោយជ្រាបនូវប្លង់ចម្លាក់តូចៗប្រែពណ៌បៃតងខ្ចី ដូចពាក់សក់ថ្មី នៅទីតាំងទាំង ២ ខាងលើ គេសង្កេតឃើញមានភ្ញៀវទេសចរជាតិ និង អន្តរជាតិ មានចំណាប់អារម្មណ៍ខ្លាំង ចង់ទៅទស្សនាផ្ទាល់ភ្នែក និង ផ្ដិតយកនូវរូបភាពទុកជាអនុស្សាវរីយ៍ ត្បិតថាការទស្សនាតំបន់ប្រាសាទក្នុងរដូវវស្សា គឺជាទិដ្ឋភាពដ៏អស្ចារ្យមួយ និង ប្លែកអារម្មណ៍ខ្លាំង៕
រូបភាព ៖ ញឹម ស៊ីដេត
