បើគិតមកដល់ពេលនេះ មានរយៈពេលប្រមាណជាង ៤០ ឆ្នាំ មកហើយ ដែលតារាកំប្លែងនាយ ចាបចៀន បានបន្តឈរជើងលើវិថីសិល្បៈយ៉ាងមានប្រជាប្រិយភាព ខណៈមានសិស្សប្អូនជំនាន់ក្រោយរីកដុះដាលជាបន្តបន្ទាប់ក្តី។ ងាកមកកាន់ជីវិតឯកជនឯណោះវិញ នាយ ចាបចៀន និង ភរិយា បានរៀបការយៈពេលជិត ៣០ ឆ្នាំមកហើយ ដោយទទួលបានចំណងដៃកូនប្រុស ១ នាក់ និង ស្រី ២ នាក់។
ជាការពិតណាស់ កន្លងមកនាយ ចាបចៀន បានជម្រាបថា កូនៗរបស់លោកពុំមានដុងសិល្បៈដូចជារូបលោកទេ ហើយលោកក៏មិនដែលបង្ខំឱ្យកូនៗដើរតាមគន្លងនោះដែរ ពោលគឺ លោកមានតែជំរុញឱ្យពួកគេធ្វើអ្វីដែលពួកគេចង់ធ្វើ ជាពិសេសលោកចង់ឱ្យកូនៗសិក្សាឱ្យបានខ្ពស់ និងយកជំនាញ និងចំណេះដឹងទាំងនោះទៅធ្វើការងារដែលពួកគេស្រឡាញ់ ឬជួយដល់ការងារសង្គមច្រើនជាង ។ ម្យ៉ាងវិញ បច្ចុប្បន្នកូនប្រុសស្រីរបស់ នាយ ចាបចៀន សុទ្ធតែធំពេញកំលោះក្រមុំ ដោយខ្លះបានបញ្ចប់ថ្នាក់បរិញ្ញាបត្រ និង ខ្លះនៅបន្តការសិក្សានៅឡើយ។
ជាក់ស្តែង ថ្មីៗនេះ នៅលើផេកហ្វេសប៊ុកផ្លូវការរបស់តារាកំប្លែងជើងចាស់រូបនេះ បានបង្ហាញអារម្មណ៍យ៉ាងរំភើបចិត្តក្នុងនាមជាឪពុក ដោយកូនស្រីពៅរបស់លោកបានប្រឡងជាប់ចំណាត់ថ្នាក់លេខ ១ ប្រចាំឆ្នាំ ខណៈកូនស្រីច្បង និង កូនប្រុសកណ្តាល ក៏សុទ្ធសឹងតែជាសិស្សពូកែ បញ្ចប់ថ្នាក់បរិញ្ញាបត្ររួចរាល់ហើយនោះ៕
កូនស្រីពៅ នាយ ចាបចៀន
កូនស្រីបង នាយ ចាបចៀន
កូនប្រុសទី ២ នាយ ចាបចៀន
