ជាការពិតណាស់ ស្ថានភាពនៅតាមបន្ទាត់ព្រំដែន នៅមិនទាន់មានស្ថានភាពប្រសើរឡើងនៅឡើយនោះទេ ខណៈប្រជាជននៅតាមតំបន់មួយចំនួន នៅមិនទាន់អាចវិលត្រឡប់ទៅកាន់ផ្ទះសម្បែងវិញ និង បន្តរស់នៅក្នុងជំរំភៀសសឹកនៅឡើយ។ ម្យ៉ាងវិញទៀត រដូវវស្សាក៏បានចូលមកដល់ ការរស់នៅក្នុងជំរំភៀសសឹក ក៏កាន់រងការប៉ះពាល់ដល់ប្រជាជនផងដែរ។
យ៉ាងណាមិញ ថ្មីៗនេះតាមរយៈការឱ្យដឹងពី កញ្ញា គីន សំណាង អនុប្រធានការិយាល័យកម្មវិធី នៃនាយកដ្ឋានអភិវឌ្ឍន៍យុវជន និង កម្មវិធី នៃសសយក បានសហការណ៍នឹង លោក អុីវ៉ុង ហ្សាម៍ បានរៀបគម្រោងស្ម័គ្រចិត្ត ក្នុងការរៀបចំជម្រកសម្រាប់ជនភៀសសឹក ដោយគម្រោងនោះមានឈ្មោះថា «គម្រោង ១ ២ ៣ ជម្រកជនភៀសខ្លួន»។
ក្នុង គម្រោង ១ ២ ៣ នេះដែរ មានគោលបំណងលើកកម្ពស់ជម្រកបណ្ដោះអាសន្នឱ្យកាន់តែមានសុវត្ថិភាព ផាសុកភាព រឹងមាំ និង ងាយស្រួលដំឡើង ដោយគម្រោងនេះត្រូវបានបង្កើតឡើងជាគម្រោងស្ម័គ្រចិត្ត និង ត្រូវការការចូលរួមពីមហាជនទាំងអស់គ្នា។ លើសពីនោះ បេសកកម្មនេះ មិនត្រឹមតែផ្តល់ជម្រកបន្ទាន់ប៉ុណ្ណោះទេ ប៉ុន្តែថែមទាំងបង្រៀនឱ្យសហគមន៍អាចសង់ និង ថែរក្សាជម្រកដោយខ្លួនឯងបានផងដែរ។
តាមរយៈ កញ្ញា គីន សំណាង ក៏បានបន្ថែមថា «គម្រោង ១ ២ ៣ ជម្រកជនភៀសខ្លួន» បានធ្វើការសាកល្បងរួលរាល់ហើយ ដោយក្នុងនោះ មហាជនអាចបន្តចូលរួមជាមួយគម្រោងនេះបានដល់ថ្ងៃទី ០៤ ខែកញ្ញា ឆ្នាំ ២០២៥ ខាងមុខនេះ ដោយត្រឹមតែម្នាក់ ៥ ពាន់ រៀល ដើម្បីចូលរួមជាក្តីស្រឡាញ់ និង ក្ដីសង្ឃឹម។ លើសពីនោះ ការរៀបចំជម្រកនៃគម្រោងនេះ គឺជាការគិតគូរបំផុតដល់ប្រជាជនភៀសសឹក នារដូវវស្សានេះ៕
