កាលពីថ្ងៃទី ១៥ ខែកក្កដា ឆ្នាំ ២០២៥ កន្លងទៅនេះ មានករណីចលាចលនៅប្រាសាទតាមាន់ធំម្តងទៀតហើយ ក្រោយពីទាហានថៃបានព្យាយាមរារាំងមិនឱ្យស្រ្តីជនជាតិខ្មែរម្នាក់ឡើងទៅទស្សនាប្រាសាទតាមាន់ធំ បង្កទៅជាការទាស់សម្តីគ្នាជាខ្លាំង រហូតដល់ទាហានទាំងសងខាងចូលមកអន្តរាគមន៍។
យ៉ាងណាមិញ ក្រោយពីកើតហេតុរួច ខាងអាជ្ញាធរ និង ទាហានទាំងពីរប្រទេសក៏បានសម្របសម្រួលគ្នា ធ្វើឱ្យស្ថានការណ៍ត្រឡប់មកដូចដើមវិញបានយ៉ាងឆាប់រហ័ស ប៉ុន្តែខាងភាគីថៃ ហាក់មិនចោលចរិតឡើយ ជាពិសេសគឺចៅហ្វាយស្រុក Phanom Dongrak ដែលនិយាយយកល្អតែខ្លួនឯង ដោយចោទថាខាងកម្ពុជា គឺជាអ្នកបង្ករឿងមុន។
Ekanan Si-in ចៅហ្វាយស្រុក Phanom Dongrak បានអះអាងថា ស្រ្តីជនជាតិខ្មែរខាងនេះ ជាមនុស្សមុខដដែល ដែលបានព្យាយាមមកបង្ករឿងម្តងរួចទៅហើយ ដោយបានរៀបចំត្រៀមជើងការមករួចរាល់។ ចៅហ្វាយស្រុករូបនេះ បន្តទៀតថា ខាងអាជ្ញាធរមូលដ្ឋានបានត្រៀមក្នុងការទប់ស្កាត់ជាមួយនឹងការផ្ទុះអាវុធ ដោយនឹងជម្លៀសប្រជាជនថៃ ក៏ដូចអ្នកលក់ដូរផ្សេងៗនៅទីនេះចេញភ្លាមៗបើសិនជាមានអាសន្នណាមួយកើតឡើង៕
ប្រភព៖ AMARINTV
