ថ្មីៗកាលពីល្ងាចថ្ងៃ សៅរ៍ ទី ២៥ ខែ មករា នេះ លោក Oliva Kong ដែលជាអ្នកច្នៃម៉ូដដ៏ល្បី និង ជាស្ថាបនិកម៉ាកសម្លៀកបំពាក់ KALIN បានបញ្ចេញខូឡិកហ្សិនថ្មីបើកទំព័រឆ្នាំ ២០២៥ ធ្វើឱ្យកក្រើកពិភពហ្វេហ្សិននៅកម្ពុជា។ ជាមួយម៉ាក KALIN លោកបានបញ្ចេញឈុតសម្លៀកបំពាក់បែប Couture ឬម៉ូដប្រណីតលំដាប់ខ្ពស់ ក្រោមប្រធានបទ បរមវិស្ណុលោក ឬ KALKIN VISHNU LOK EMPIRE COUTURE COLLECTION 2025។
បង្ហាញម៉ូដដោយតារាសម្តែង តារាចម្រៀង និង ម៉ូឌែលអាជីពជាច្រើនរូប ពីមួយឈុតទៅមួយឈុត ខ្លះមានលក្ខណៈហ្វេហ្សិន ខ្លះបែបសហសម័យ និង ខ្លះទៀតមើលមកទំនើបស៊ីវិល័យ។ តាមការបង្ហើបមកកាន់ «ប្រជាប្រិយ» លោក Oliva Kong ថាខូឡិកហ្សិនថ្មីនេះ លោកបានបំផុសគំនិតពី ៥ សម័យកាល មានការកកើតភពផែនដី សម័យអាណាចក្រអង្គរ បែកបាក់ក្រុងអង្គរ របបខ្មែរក្រហម និង សម័យបច្ចុប្បន្ន។
លម្អិតជាក់ស្តែងនៅលើសម្លៀកបំពាក់ ដូចជាអាវបំណែកដែក គ្រាប់កាំភ្លើង ឈុតខ្លះពណ៌ខ្មៅមានរំលេចក្រមាខ្មែរ សុទ្ធតែបង្ហាញពីសម័យសង្គ្រាមដែលប៉ះពាល់ បង្កការកាប់សម្លាប់ បែកបាក់ ព្រាត់ប្រាស និង រហូតដល់ឈុតទំនើបបង្ហាញពីសម័យសន្តិភាព។
សម្រាប់គោលបំណងនៃខូឡិកហ្សិននេះ លោកលើកឡើងថា ដោយសារប្រទេសជាតិយើងធ្លាប់ជួបសង្គ្រាមបង្កផលប៉ះពាល់ជាច្រើន ដូច្នេះមកដល់សម័យទំនើប ប្រទេសមានសុខសន្តិភាព លោកចង់ឱ្យកូនខ្មែរចេះរួបរួមគ្នា សាមគ្គីគ្នា រួមទាំងលើកស្ទួយអ្នកដែលមានសមត្ថភាព ដើម្បីអភិវឌ្ឍន៍ប្រទេសជាតិយើងឱ្យរីកចម្រើន៕
