មិនចាញ់ច្រាបថៃទេ! អភិបាលខេត្តបន្ទាយមានជ័យ លើកពីផ្លូវច្បាប់តបទៅអភិបាលខេត្តស្រះកែវ ជុំវិញបញ្ហាលំនៅឋានរបស់ពលរដ្ឋ នៅតំបន់ព្រំដែនរវាងប្រទេសទាំងពីរ

នៅព្រឹកថ្ងៃទី ០៤ ខែកញ្ញា ឆ្នាំ ២០២៥ នេះ អភិបាលខេត្តបន្ទាយមានជ័យ បានផ្ញើលិខិតឆ្លើយតបទៅអភិបាលខេត្តស្រះកែវ ប្រទេសថៃវិញ លើករណីលិខិតរបស់ខេត្តស្រះកែវ ស្នើសុំកិច្ចសហការដោះស្រាយបញ្ហា ផ្ទះប្រជាពលរដ្ឋនៅតំបន់ព្រំដែនក្នុងខេត្តបន្ទាយមានជ័យ និង ខេត្តស្រះកែវ។

តាមរយៈលិខិត អភិបាលខេត្តបន្ទាយមានជ័យ បានបញ្ជាក់ជូនអភិបាលខេត្តស្រះកែវឱ្យបានដឹងថា បញ្ហាខាងលើនេះ គឺជាបញ្ហាពាក់ព័ន្ធនឹងការគ្រប់គ្រងព្រំដែន និង ការងារវាស់វែងខណ្ឌសីមា និង បោះបង្គោលព្រំដែន ដែលជាសមត្ថកិច្ចរបស់គណៈកម្មាធិការព្រំដែន ទូទៅកម្ពុជា-ថៃ (GBC) និង គណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ កម្ពុជា-ថៃ ស្របតាមកិច្ចព្រមព្រៀងស្តីពីកិច្ចសហប្រតិបត្តិការព្រំដែន ចុះថ្ងៃទី ២៩ ខែកញ្ញា ឆ្នាំ ១៩៩៥ និង អនុស្សរណៈនៃការយោគយល់គ្នា ស្តីពីការវាស់វែង ខណ្ឌសីមាព្រំដែនគោកកម្ពុជា-ថៃ ឆ្នាំ ២០០០ (MOU ២០០០)។

អភិបាលខេត្តបន្ទាយមានជ័យ បានបន្តថា ការធ្វើសកម្មភាពដោយឯកតោភាគីណាមួយ ប៉ះពាល់ដល់ប្រជាពលរដ្ឋដែលកំពុងរស់នៅ និង អាស្រ័យផលក្នុងតំបន់នោះ ជាការបំពានដល់ MOU ២០០០, កិច្ចព្រមព្រៀងឈប់បាញ់ រវាងកម្ពុជា និង ថៃ នាថ្ងៃទី ២៨ ខែកក្កដា ឆ្នាំ ២០២៥ និង ស្មារតីនៃកិច្ចប្រជុំវិសាមញ្ញនៃគណៈកម្មាធិការ ព្រំដែនទូទៅកម្ពុជា-ថៃ (GBC) នាថ្ងៃទី ៧ ខែសីហា ឆ្នាំ ២០២៥ នៅប្រទេសម៉ាឡេស៊ី ព្រមទាំងស្មារតីនៃកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) រវាងប្រទេសទាំងពីរ នាថ្ងៃទី ២២ ខែសីហា ឆ្នាំ ២០២៥។

អភិបាលខេត្តបន្ទាយមានជ័យ បានស្នើឱ្យអភិបាលខេត្តស្រះកែវ រក្សាស្ថានភាពព្រំដែន និង ស្ថានភាពប្រជាជនកំពុងរស់នៅពេលបច្ចុប្បន្ន ហើយទុកកិច្ចការងារនេះជូនទៅ GBC និង JBC ដែលជាយន្តការមានសមត្ថកិច្ចក្នុងការដោះស្រាយបញ្ហានេះ។ ឯកឧត្តមសង្ឃឹមជឿជាក់ថា បញ្ហាខាងលើនេះនឹងមានដំណោះស្រាយល្អ ប្រកបដោយសន្តិវីធី ឈរលើគោលការណ៍ច្បាប់អន្តរជាតិ នៅក្នុងកិច្ចប្រជុំ GBC និង JBC នាពេលដ៏ខ្លីខាងមុខនេះ៕

សូមអានសេចក្ដីលម្អិតនៅខាងក្រោម ៖