នៅចុងសប្តាហ៍នេះ កម្មវិធីប្រកួត MasterChef Cambodia រដូវកាលទី ៤ នឹងឈានដល់សប្តាហ៍ទី ៥ ហើយ។ ក្នុងនោះដែរ ៤ សប្តាហ៍កន្លងទៅ ក៏ឃើញមានអ្នកទស្សនាជាច្រើនបានស្វែងរកឃើញ Idol ក្នុងដួងចិត្តរួចមកហើយ ដោយក្នុងបេក្ខភាពទាំងអស់សុទ្ធសឹងតែមានសមត្ថភាព។
ដោយឡែក ងាកមកកាន់បេក្ខភាពមកពីខេត្តព្រៃវែង ដែលមានអាជីពជាគ្រូកីឡា គឺលោក កែវ សុខហេង ឯណោះវិញ ក៏ត្រូវបានអ្នកទស្សនាចាប់អារម្មណ៍ដូចគ្នាដែរពីសមត្ថភាព និង រូបសម្រស់ដ៏ស្រស់សង្ហារបស់លោក។
អ្វីដែលកាន់តែធ្វើឱ្យអ្នកគាំទ្រចាប់អាម្មណ៍ថែមទៀតនោះ បេក្ខជន កែវ សុខហេង គឺជាប្អូនប្រុសបង្កើតរបស់បេក្ខភាពឆ្នើម Top 6 MasterChef Cambodia រដូវកាលទី ៣ អ្នកនាង កែវ ច័ន្ទរស្មី។
ក្នុងនោះ ក្រោយបានដឹងថា បេក្ខជន កែវ សុខហេង ជាប្អូនប្រុសបង្កើតរបស់អ្នកនាង កែវ ច័ន្ទរស្មី មិនត្រឹមធ្វើឱ្យអ្នកគាំទ្រភ្ញាក់ផ្អើលនោះទេ តែបើនិយាយពីសមត្ថភាពវិញនោះ អ្នកគាំទ្រក៏សរសើរដូចគ្នាដែរថា លោក កែវ សុខហេង មានទឹកដៃចម្អិនម្ហូបមិនចាញ់បងស្រីនោះឡើយ៕
