ក្រោយកម្មវិធី Miss Supranational Cambodia 2025 បានប្រកួតចប់ និង បានរកឃើញម្ចាស់មកុដហើយនោះ មហាជនអ្នកលេងបណ្តាញសង្គមហ្វេសប៊ុក ច្បាស់ជាបានឃើញមកហើយនូវការបញ្ចេញមតិប្រតិកម្មមិនទទួលយកលទ្ធផលក្នុងការប្រកួត ពីសំណាក់ អេនណា រ៉ូស ដែលជាបេក្ខភាពមួយរូបនៃកម្មវិធីខាងលើនេះ។
ពិតណាស់ អេនណា រ៉ូស បានធ្វើឱ្យមហាជនអ្នកលេងបណ្ដាញសង្គមបន្តវែកញែកខ្លាំង ដោយមានទាំងបវរកញ្ញារៀមច្បង និង សិល្បករមួយចំនួន ក៏បាននាំគ្នាបញ្ចេញមតិទៅលើការប្រតិកម្មហាក់ខុសទំនងរបស់នាងជាបន្តបន្ទាប់ផងដែរ ដែលមានដូចជាការបង្ហោះសារ និង វីដេអូ ជាដើម។
ជាក់ស្តែង រយៈពេលប្រមាណជិត ១ សប្តាហ៍ ក្រោយបញ្ចប់ការប្រកួត Miss Supranational Cambodia 2025 អេនណា រ៉ូស នៅបន្តបង្ហោះសារមិនឈប់ និង ដាក់បន្ទុកថា កម្មវិធីយកអ្នកចូល Top សុទ្ធតែខ្សែជាដើម។ ក្នុងនោះ សារមួយរបស់ អេនណា រ៉ូស បានបង្ហោះកាលពីថ្ងៃទី ០៦ ខែមេសា ឆ្នាំ ២០២៥ កន្លងទៅ បានរៀបរាប់ថា៖ «ការឆ្លើយសំណួរ ពិតជាសំខាន់ណាស់! ហេតុអ្វីមិនស្ដាប់បេក្ខភាពឆ្លើយហើយជ្រើសរើស មុនចូល Top ហេតុអ្វី យកបេក្ខភាព ដែលគិតថាត្រូវចូល Top ដោយចិត្តឯង នេះគេថាស៊ីខ្សែ។ សូមបញ្ឈប់ទង្វើបែបនេះ ពីព្រោះអ្នកមានសមត្ថភាពពិតប្រាកដគេគិតបែបណា! រឿងខ្លះស្ដាប់ហើយចោល តែនេះឃើញនឹងភ្នែក ស្ដាប់ឮនឹងត្រចៀក ទើបដឹងថា អ្វីក៏ដោយក៏អាចកើតឡើង។ សូមអរគុណ»។
ក្រោយបានឃើញសាររបស់ អេនណា រ៉ូស បន្តផុសជាហូរហែ ទីបំផុតភាគី នៃអ្នករៀបចំកម្មវិធី គឺអ្នកនាង សារ៉ាពេជ្រ ក៏បានចេញមុខមកបញ្ចេញមតិលើសារខាងលើរបស់ អេនណា រ៉ូស ដោយបានបញ្ជាក់ច្បាស់ៗថា៖ «បងមិនចង់និយាយអីច្រើនទេ! កាលអូនចូល គណៈកម្មការឃើញថាអូនតស៊ូ ផ្តល់ឱកាសជូន ហើយពេលអូនចូលកម្មវិធីមានគេស្រឡាញ់ច្រើនណាស់ ព្រោះមកពីកម្មវិធីជួយយោងទេ កុំធ្វើឱ្យគេស្អប់ច្រើន ការល្បីដោយគេស្អប់។ ដូចបងនិយាយវាមិនមែនល្អ ឬចង់ចាស់ទៅហើយស្លាប់បាត់នៅតែស្ពាយការស្អប់រហូត? អូនធ្វើចឹងគេអាសូរអូនវិញ បើអូនគិតថាខ្លួនខ្លាំង អូនប្រាកដជាមើលឃើញពីចំណុចខ្សោយខ្លួនឯងប្រាកដណាស់។ បើអូនជាមនុស្សល្ងង់ ទើបមើលអត់ឃើញពីចំណុចខ្សោយខ្លួនឯង កម្មវិធីបងមានតែគេជេរដោយសារអូន មិនមែនល្បីដោយសារអូនទេ អារម្មណ៍អូនឡើងចុះកូររាល់ដង ដៀល ឈ្លោះជាមួយបេក្ខភាព មិនឱ្យតម្លៃគេ បើមិនមានការអាណិតខាងម្ចាស់កម្មវិធីគេមិនបន្តឱ្យអូនបានមានកិត្តិយសដើរគ្រប់ឆាកទេ»៕
