រយៈពេលប្រមាណជាង ១ ឆ្នាំហើយ ដែលតារាសម្ដែង លោក សឿន វីតា បានផ្ទុះព័ត៌មានជំពាក់បំណុលខ្ទង់ជាង ២០ ម៉ឺនដុល្លារ ដោយក្នុងអំឡុងពេលនេះ លោក និង គ្រួសារ បានប្រឹងប្រែងរកស៊ីលក់ដូរម្ហូបអាហារផ្សេងៗទាំងយប់ទាំងថ្ងៃ ដើម្បីយកលុយទៅសងបំណុលគេ។
បន្ទាប់ពីការខំប្រឹងអស់មួយរយៈធំសឹងមិនស្គាល់ពេលសម្រាក មកដល់ពេលនេះ លោក សឿន វីតា បានឱ្យដឹងថា លោកបានសងទៅម្ចាស់បំណុលបានប្រមាណជិតពាក់កណ្តាលហើយ ចំណែកនៅសល់ប៉ុន្មានទៀត លោក និង ភរិយាក៏កំពុងរកលុយបន្តបន្ទាប់។
យ៉ាងណាមិញ ស្រាប់តែនៅថ្ងៃទី ០៨ ខែមេសា ឆ្នាំ ២០២៥ នេះ លោក សឿន វីតា បានបង្ហោះសារ សុំម្ចាស់បំណុលឱ្យអនុគ្រោះទុកពេលដល់លោកជាថ្មី ខណៈលោកមិនចង់រស់នៅបន្ទប់ជួលម្តងទៀត ស្របពេលលុយដើមរបស់លោកនៅសល់តិចតួច។
តាមការបង្ហោះរបស់លោក សឿន វីតា បានរៀបរាប់ថា៖ «ខ្ញុំមិនចង់ត្រឡប់ទៅបន្ទប់ជួលម្តងទៀតទេ ព្រោះខ្ញុំដើរដល់ចំណុចនេះហើយ! កាល ២ ឆ្នាំមុន ខ្ញុំលក់បណ្តើរ ដកលុយសងគេបណ្តើរ រហូតដល់ខ្ញុំអស់ដើមរកស៊ី លទ្ធផលចុងក្រោយតែកន្លែងរស់នៅក៏គ្មានដែរ ទៅសុំវត្តនៅក៏វត្តមិនទទួលដែរ។ ខ្ញុំសុំឱ្យម្ចាស់លុយទាំងអស់ទុកពេលឱ្យខ្ញុំ ៤ ខែ ទៀតចាំខ្ញុំសងបន្ត។ ពេលនេះដើមខ្ញុំនៅតិចតួចណាស់ បើបងប្អូនឆាតមកទៀត គឺខ្ញុំបាញ់លុយដើមសងអស់ គ្រប់យ៉ាងខ្ញុំចប់ហើយ! សង្ឃឹមថាបងប្អូនអ្នកមានគុណ ម្ចាស់លុយឃើញហើយយោគយល់ដល់ខ្ញុំផង។ សុំឱ្យខ្ញុំងើបរឹងមាំខ្លាំងបន្តិចសិន»៕
