ថ្មីៗនេះ មានរឿងរ៉ាវរបស់ស្រ្តីម្នាក់ ដែលសុខចិត្តចំណាយលុយជិះយន្តហោះទៅវិញទៅមកពីកន្លែងធ្វើការរាល់ថ្ងៃ ព្រោះតែចំណេញជាងថ្លៃដែលត្រូវជួលបន្ទប់ស្នាក់នៅ នៅជិតកន្លែងធ្វើការ។
តាមព័ត៌មានបានឱ្យដឹងថា ស្រ្តីរូបនេះមានឈ្មោះថា Racheal Kaur បានធ្វើដំណើរដោយយន្តហោះ ទៅធ្វើការនៅទីក្រុងកូឡាឡាំពួរជារៀងរាល់ថ្ងៃ ដោយនាងតែងតែងើបពីម៉ោង ៤ ព្រឹកជានិច្ច ដើម្បីរៀបចំខ្លួន និង ឡើងយន្តហោះនៅម៉ោង ៥ និង ៥៥ នាទី ហើយចំណាយពេលប្រហែល ៣០ ទៅ ៤០ នាទី ទើបដល់កន្លែងធ្វើការ។
Racheal បានឱ្យដឹងថា នាងសុខចិត្តជិះយន្តហោះចុះឡើងបែបនេះ ព្រោះតែមិនចង់ចំណាយលុយទៅលើការជួលបន្ទប់ស្នាក់នៅជិតកន្លែងធ្វើការ ដោយសារតែវាថ្លៃជាងការចំណាយរបស់នាងលើការជិះយន្តហោះទៅទៀត ម្យ៉ាងនាងក៏ចង់ទៅផ្ទះដើម្បីនៅជិតកូនៗរបស់នាងផងដែរ។
យ៉ាងណាមិញ បើទោះបីនាងជាបុគ្គលិកនៅក្រុមហ៊ុនជើងហោះហើរដែលនាងធ្វើដំណើរប្រចាំថ្ងៃនេះក៏ដោយ តែនាងនៅតែបង់ថ្លៃពេញចំពោះសំបុត្រយន្តហោះ នាងមិនបានទទួលការបញ្ចុះតម្លៃ ឬ សិទ្ធិពិសេសណាមួយពីក្រុមហ៊ុនឡើយ៕
ប្រភព៖ Khaosod
