តាមគម្រោង នៅព្រឹកថ្ងៃទី ១៤ ខែមិថុនា ឆ្នាំ ២០២៥ នេះ រដ្ឋាភិបាលប្រទេសទាំងពីរកម្ពុជា-ថៃ នឹងបើកកិច្ចប្រជុំគណៈកម្មការព្រំដែនចម្រុះ JBC ដោយខណៈភាគីខាងកម្ពុជាកំពុងរង់ចាំភាគីថៃមកចូលរួម តែយ៉ាងណាមកដល់ពេលនេះមិនទាន់ឃើញភាគីថៃចូលដល់កន្លែងប្រជុំនៅឡើយទេ។ គួរឱ្យដឹងដែរថា កិច្ចប្រជុំនេះដំណើរការនៅទីក្រុងភ្នំពេញ ក្នុងទីតាំងសណ្ឋាគារសូហ្វីតែល។
ស្របនឹងមានកិច្ចប្រជុំនៅក្នុងថ្ងៃនេះ បើងាកទៅសារព័ត៌មានថៃ Khaosod បានចុះផ្សាយអត្ថបទមួយនិយាយពីឧត្តមសេនីយ៍ឯក Boonsin Padklang មេបញ្ជាការកងទ័ពភូមិភាគទី ២ ដោយលោកបាននិយាយទាក់ទងនឹងជម្លោះព្រុំដែនកម្ពុជា-ថៃជុំវិញតំបន់ប្រាសាទទាំង ៣ និង មុំបីថា ទឹកដីទាំងនេះរបស់លោកនៅត្រង់នេះយូរហើយ បើចង់យកទៅក៏ត្រូវវ៉ៃគ្នា មិនបាច់ឡើងទៅតុលាការពិភពលោកទេ។
ឧត្តមសេនីយ៍ឯក Boonsin Padklang មេបញ្ជាការកងទ័ពភូមិភាគទី ២ រូបនេះ បានបោះសម្តីយ៉ាងគឃ្លើនបែបនេះនៅក្នុងពេលផ្តល់បាឋកថាពិសេសមួយដល់និស្សិតសាលាយោធាភូមិភាគទី ៥ លើប្រធានបទ ប្រាសាទទាំង ៣ និង តំបន់មុំ ៣។ លោកបានប្រាប់ដល់និស្សិតយោធាថា មិនបាច់បារម្ភថានឹងត្រូវឡើងតុលាការពិភពលោក ឬយ៉ាងណានោះទេ ខ្លួនបានប្រាប់រដ្ឋាភិបាលហើយថាមិនបាច់ឡើងទេ តុលាការមិនបានពាក់ព័ន្ធ ព្រោះទឹកដីយើងនៅត្រង់នេះយូរណាស់ហើយ បើចង់យកមានតែត្រូវវ៉ៃគ្នា ប៉ុណ្ណេះក៏ចប់ហើយ មិនដឹងឃើញពិបាកអីផង។
លោកបានឱ្យដឹងទៀតថា ការឡើងតុលារការពិភពលោក ទាល់តែភាគីទាំងពីរយល់ព្រម ទើបតុលាការទទួលពិចារណាក្តីឱ្យ ហើយបើសិនជាភាគីណាមួយមិនព្រមទទួលយក នោះ តុលាការក៏មិនទទួលពិចារណាឱ្យដែរ វិធីនេះហើយដែលរដ្ឋាភិបាលនឹងប្រើ៕
ប្រភព៖ Khaosod
