ថ្មីៗនេះ តារាចម្រៀងស្រី សួស វីសា បានធ្វើឱ្យមហាជនមានការចាប់អារម្មណ៍ រហូតដល់មានការចែករំលែកខ្លាំងជុំវិញរឿងរ៉ាវផ្ទុះវែកញែកទាក់ទងនឹងវីដេអូមួយរបស់តារាស្រីរូបនេះ និង គ្រួសារ បានបង្ហាញសកម្មភាពចូលញ៉ាំភីហ្សានៅហាងមួយកន្លែង ដែលត្រូវបានគេដឹងថាភីហ្សាប្រេនរបស់ថៃ។
ក្រៅពីមហាជនអ្នកលេងហ្វេសប៊ុក ក៏មានបុគ្គលល្បីៗបានចែករំលែកពាសពេញបណ្ដាញសង្គម និង បញ្ចេញមតិវែកញែករៀងៗខ្លួនជុំវិញរឿងរ៉ាវនេះដែរ ដែលភាគច្រើនមហាជនបង្ហាញការខកចិត្តខ្លាំងចំពោះសកម្មភាពរបស់ប្ដីប្រពន្ធអ្នកទាំងពីររូបនេះ ស្របពេលមហាជនកំពុងពហិការមិនប្រើប្រាស់ផលិតផលដែលមានស្លាកយីហោរនាំចូលពីប្រទេសថៃនោះ។
ដោយឡែក ក្រោយផ្ទុះការរិះគន់ខ្លាំងពេញបណ្ដាញសង្គម មុននេះគេបានឃើញ សួស វីសា បានបង្ហោះសារបកស្រាយ និង បង្ហាញការសុំទោសចំពោះកំហុសអចេតនា ព្រមទាំងរៀបរាប់ពីមូលហេតុដែលនាង និង គ្រួសារ ចូលញ៉ាំភីហ្សារនោះផងដែរ។
ទន្ទឹមគ្នានោះដែរ ក្រោយ សួស វីហ្សា ជាភរិយាបានចេញមុខសុំទោស និង បកស្រាយហើយនោះ លោក ថមមី ជាស្វាមី ក៏បានចេញមកបង្ហោះសារបន្ថែម និង បញ្ជាក់ជុំវិញរឿងរ៉ាវដ៏ក្តៅគគុកនេះទៀតថា ៖ «អរុណសួស្តី ពុកម៉ែបងប្អូនជនរួមជាតិ សូមផុសសារតបពីប្រទេសបារាំង ទៅកាន់មហាជនខ្មែរឱ្យបានជ្រាបថា ជាដំបូងសូមទទួលកំហុសបើមានការខុសឆ្គង រឿងចូលហាង ភីហ្សា របស់ពួកអាសៀម ខុស តែពិតជាអត់ដឹងថាវាជារបស់សៀមពិតមែន ព្រោះពួកខ្ញុំចូលហ្នឹង គឺនៅព្រលានយន្តហោះថ្មីយើងទេ ហើយស្របពេលមានកូនៗ មានក្មួយរញ៉េរញៃនាំគ្នាឃ្លានចង់ហូប មកជូនដំណើរពួកយើងមកកាន់បារាំងនេះ។ បើពួកខ្ញុំបានដឹងពិតមែន ក៏មិននាំក្រុមគ្រួសារចូលដែរ។
សូមជម្រាបជូនមហាជនឱ្យបានដឹង និង ជួយពិចារណាលើចំណុចនេះផង តែពួកយើងខ្ញុំអត់យល់ត្រង់ថា ហេតុអ្វីមានហាងសៀមលក់នៅលើព្រលានយន្តហោះថ្មីនេះ ពួកខ្ញុំឆ្ងល់ហេតុអីមានវាលក់នៅព្រលានអ៊ីចឹង? បើស្អប់វាគួរកុំមាននៅព្រលានខ្មែរ ដូច្នេះទើបពួកខ្ញុំអ្នកចូលបានដឹងហើយនឹងមិនចូល មួយវិញទៀតមានកូនខ្មែរច្រើនដែលពួកគាត់ក៏មិនបានដឹងរឿងនេះ និង ចូលច្រើនដូចគ្នា! សង្ឃឹមថាក្រោយពេលពួកខ្ញុំត្រូវបានគេនាំគ្នារិះគន់ច្រើនរឿងនេះ ជាសារក្រើនរំឭកដល់កូនខ្មែរឈប់ចូលពិសារហាងនេះ ដែលមានលក់នៅព្រលានយន្តហោះថ្មីខ្មែរយើង ហាងនេះមានលក់នៅជាន់ទី ១ ក្នុងព្រលានយន្តហោះថ្មីតែម្តង។
បើអាចសំណូមពរឱ្យខាងព្រលានយន្តហោះ បិទហាងនេះទៅកុំឱ្យមានការយល់ច្រឡំច្រើន ជាពិសេសអ្នកដំណើរចូលបន្តទៀត ព្រោះខណៈកំពុងទៅធ្វើដំណើរ គឺពិតជាមិនបានគិតបានគ្រប់ជ្រុងជ្រោយទេ ដោយសារត្រូវប្រយ័ត្នរឿងហោះហើរច្រើនជាង។ សង្ឃឹមអ្នកគ្រប់គ្នាយល់ពីរឿងនេះ និង សូមអធ្យាស្រ័យ និង សូមឱ្យបងប្អូនបានជួយប្រាប់ផងថា តើហាងណាផ្សេងៗទៀតដែលជារបស់សៀម មកកាន់យើងខ្ញុំផង បើដឹងមិនចូលទេ មិនថាគេមិនថាយើង ព្រោះកន្លងមកខ្ញុំជាអ្នកពហិការណាស់រឿងផលិតផលសៀមនេះ។
ដូច្នេះសូមបងប្អូនជួយប្រាប់ផងណានឹងជឿថា រឿងនេះជាមេរៀនសម្រាប់រំឭកដល់កូនខ្មែរគ្រប់គ្នា ជាពិសេសអ្នកដែលបើកហាងសៀម និង អ្នកអនុញ្ញាត្តិឱ្យបើកហាងសៀមនៅខ្មែរ! សូមអរគុណ សូមរីករាយសុខសប្បាយទាំងអស់គ្នា ពីក្រុមគ្រួសារយើងខ្ញុំពីប្រទេសបារាំងទៅកាន់កូនខ្មែរយើងគ្រប់រូប»៕
