និយាយពីសិល្បៈចម្រៀងរបស់អ្នកនាង សុគន្ធ និសា និង ពេជ្រ សូលីកា សុទ្ធសឹងតែជាតារាចម្រៀងស្រី ដែលកំពុងក្ដោបបានសន្ទុះទីផ្សារខ្លាំងមិនធម្មតា ជាពិសេសលើឆាកតន្រ្តីដ៏ពេញនិយមសម្រាប់យុវវ័យបច្ចុប្បន្ន ដោយមួយរយៈចុងក្រោយ អ្នកទាំងពីរត្រូវបានអញ្ជើញចូលរួមច្រៀងក្នុងកម្មវិធីតន្រ្តីតូចធំ កម្មវិធីមង្គល និង តាមបណ្ដាក្លឹប ឬ Pub ផ្សេងៗរៀងខ្លួនៗមិនដាច់ឡើយ។
ដោយឡែក អ្វីកាន់តែធ្វើឱ្យមហាជន ជាពិសេសអ្នកគាំទ្ររបស់អ្នកនាង ពេជ្រ សូលីកា និង កំពូលតារាចម្រៀងរៀមច្បង សុគន្ធ និសា ផ្ទុះចាប់អារម្មណ៍ខ្លាំង ខណៈមួយរយៈមុនបានឃើញអ្នកទាំងពីរ ចាប់ដៃគ្នាចេញចម្រៀងរួមគ្នាជាលើកដំបូង ជាចម្រៀងបែបមនោសញ្ចេតនាស្នេហា គឺបទ «ពេលយើងឈ្លោះគ្នា» ដែលទទួលបានការគាំទ្រពេញចិត្តខ្លាំងពីមហាជនគ្រប់ស្រទាប់ និង រង់ចាំមើលការបកស្រាយរួមគ្នាដោយផ្ទាល់ពីតារាចម្រៀងស្រីទាំងពីរ លើឆាកតន្រ្តីផ្សេងៗ។
ជាក់ស្ដែង មកដល់ថ្មីៗនេះ តារាស្រីដ៏មានប្រជាប្រិយភាពជារៀមច្បង និង សិស្សប្អូនទាំងពីររូបនេះ ក៏បានចេញច្រៀងលើឆាកតន្រ្តីឯកជនមួយរួមគ្នាជាលើកដំបូង ដែលមិនត្រឹមធ្វើឱ្យបណ្ដាអ្នកគាំទ្ររំភើបចំពោះការបកស្រាយចម្រៀងរួមគ្នារបស់អ្នកទាំងពីរនោះទេ ក្រឡេកមើលតារាចម្រៀងស្រីទាំងពីររូបផ្ទាល់ ក៏បង្ហាញចិត្តរំភើបពេញដោយក្ដីគោរពស្រឡាញ់គ្នាទៅវិញទៅមកដែរ។
ជាមួយគ្នានោះ ក៏បានឃើញហ្វេសប៊ុករបស់តារាស្រី ពេជ្រ សូលីកា បានបង្ហោះរូបភាពជាមួយរៀមច្បង សុគន្ធ និសា បង្ហាញទំហំចិត្តគោរពស្រឡាញ់ចំពោះរៀមច្បង ថែមទាំងសូមឱ្យពេលវេលាល្អៗជាមួយរៀមច្បង ឋិតថេរគង់វង្សយូរអង្វែងទៀតផង៕
