បើនិយាយពីរឿងរ៉ាវឯកជន និង ដំណើរលើវិថីសិល្បៈខ្លះៗរបស់ អ្នកនាង មាស សុខសោភា ច្បាស់ជាមានអ្នកគាំទ្រជាច្រើនច្បាស់ជាបានជ្រាបហើយនៅក្នុងគ្រួសារ អ្នកនាង មាស សុខសោភា មិនមែនមានតែអ្នកនាងម្នាក់ទេ ដែលមានដុងជាអ្នកសិល្បៈ។ អ្នកនាង មាស សុខសោភា មានបងប្រុសបង្កើត គឺលោក មាស សុខរតនៈ ក៏ជាអតីតតារាចម្រៀង និង ជាអ្នកដឹកនាំដ៏ល្បីមួយរូប និង មានប្អូនជីដូនមួយប៉ុន្មានរូប ក៏ជាអ្នកសិល្បៈដែរ។
ដោយឡែក ងាកមកកាន់ក្មួយស្រីបង្កើតចំនួន ២ រូប របស់អ្នកនាង មាស សុខសោភា គឺកូនស្រីរបស់លោក មាស សុខរតនៈ ឯណោះវិញ បច្ចុប្បន្ន ក៏កំពុងបោះជំហានឈានជើងចូលវិថីសិល្បៈតាមលោកឪពុក និង ម្តាយមីងដូចគ្នាដែរ។ ក្នុងនោះ គឺមានកញ្ញា មាស សុខដារីនី និង កញ្ញា មាស សុខវីរីយ៉ា។
យ៉ាងណាមិញ ក្រោយបោះជំហានដើរតាមគន្លងរបស់ម្តាយមីង និង ឪពុកហើយនោះ ថ្មីៗនេះ កូនស្រីច្បងរបស់ លោក មាស សុខរតនៈ គឺ កញ្ញា មាស សុខដារីនី បានបោះជំហានក្លាយទៅជាតារាចម្រៀងពន្លកថ្មី និង បានបញ្ចេញចម្រៀងដំបូងរបស់ខ្លួន ដែលស័ក្តិសមសម្រាប់អ្នកកំពុងខូចចិត្តយ៉ាងខ្លាំងមានចំណងជើងថា «យ៉ាងច្រើនអូនយំ» ។ លើសពីនោះ បើនិយាយពីទឹកដមសំឡេងវិញ ដូចពាក្យចាស់ពោលថា «ស្លឹកឈើជ្រុះមិនឆ្ងាយពីគល់» ពោលគឺ កញ្ញា មាស សុខដារីនី មានសំឡេងពីរោះស្រទន់មិនខុសពីម្តាយមីង និង លោកឪពុកកាលប្រឡូកក្នុងវិស័យចម្រៀងនោះទេ៕
