សារព័ត៌មាន Daily Mails បានរាយការណ៍ពីករណីដ៏គួរឱ្យហួសចិត្ត ដែលមានបុរសម្នាក់ឡើងយន្តហោះមិនទាន់ លេងរត់ទៅឈរពាំងមុខយន្តហោះ រួចបក់ដៃហៅឱ្យពីឡុតចាំយកខ្លួនឡើងទៅសិន។
តាមព័ត៌មានបានឱ្យដឹងថា ហេតុការណ៍មួយនេះបានកើតឡើងនៅអាកាសយានដ្ឋានអន្តរជាតិ El Tepual ក្នុងទីក្រុង Puerto Montt ប្រទេសឈីលី ដោយយន្តហោះមួយគ្រឿងនោះ ជារបស់ក្រុមហ៊ុនអាកាសចរណ៍ LATAM ដែលកំពុងធ្វើដំណើរទៅកាន់ Concepción។ ក្នុងនោះ បុរសខាងលើនេះ បានរត់ចុះទៅ Runway ហើយបានទៅឈរនៅនឹងមុខយន្តហោះ ព្រមទាំងបក់ដៃហៅពីឡុត ក្នុងបំណងឱ្យចាំយកខ្លួនឡើងយន្តហោះវិញ តែត្រូវអាជ្ញាធរនៅអាកាសយានដ្ឋានទៅបញ្ឈប់សកម្មភាព ហើយចុងក្រោយក៏ត្រូវបានគេឃាត់ខ្លួន។
យ៉ាងណាមិញ តាមព័ត៌មានបានឱ្យដឹងទៀតថា បុរសរូបនេះធ្លាប់មានប្រវត្តិត្រូវគេចាប់ខ្លួនម្តងរួចមកហើយពីបទគំរាមកំហែង និង លួចទ្រព្យសម្បត្តិ។ ដោយឡែក ក្រោយកើតហេតុរួច លោក Rodrigo Wainraihgt អភិបាលក្រុង Puerto Montt ក៏បានចេញមកសម្ដែងការព្រួយបារម្ភ ចំពោះវិធានការសន្តិសុខនៅព្រលានយន្តហោះផងដែរ៕
ប្រភព៖ Sanook
