ស្របពេលឱកាសពិធីបុណ្យភ្ជុំបិណ្ឌប្រពៃណីខ្មែរបានឈានចូលមកដល់ ក្រឡេកមើលអ្នកក្នុងសិល្បៈ ឃើញថាមានតារាស្រីល្បីៗ និង បវរកញ្ញាជាច្រើនរូប បានបង្ហាញរូបភាពលើហ្វេសប៊ុក ក្នុងឈុតប្រពៃណីខ្មែរយ៉ាងស្រស់ស្អាតសមសួន ដើម្បីជាការអបអរស្វាគមន៍ពិធីបុណ្យភ្ជុំប្រពៃណីខ្មែរផងដែរ។
ដោយឡែក ងាកមើលហ្វេសប៊ុករបស់បវរកញ្ញា ពេជ្រ វត្តីសារ៉ាវឌ្ឍី វិញ ក៏មិនឱ្យរំលងក្នុងឱកាសអបអរពិធីបុណ្យភ្ជុំបិណ្ឌដែរ ដោយនាងកំពុងធ្វើឱ្យមហាជនផ្ទុះចាប់អារម្មណ៍ខ្លាំង ខណៈបានឃើញបង្ហោះរូបភាពប៉ុន្មានសន្លឹកប្លែកពីតារាស្រីដ៏ដទៃ ក្នុងឈុតប្រពៃណីបុរាណខ្មែរដ៏ស្រស់ស្អាត និង ថតរូបភាពបោះបាយបិណ្ឌ ជាការឧទ្ទិសដល់អ្នកដែលបានចែកឋានទៅកើតជាប្រេត តាមទំនៀមទម្លាប់នៃពិធីបុណ្យភ្ជុំបិណ្ឌប្រពៃណីខ្មែរ។
ក្នុងនោះដែរ ពេជ្រ វត្តីសារ៉ាវឌ្ឍី ក៏បានបង្ហោះសារភ្ជាប់ជាមួយរូបភាពក្នុងឱកាសបុណ្យភ្ជុំបិណ្ឌនេះថា ៖ «បុណ្យភ្ជុំបិណ្ឌ និង កាន់បិណ្ឌ គឺជាពិធីបុណ្យនឹករឭកដល់សាច់ញាតិដែលបានស្លាប់ទៅរបស់ជនជាតិខ្មែរ ដែលកំណត់តាមប្រតិទិនពុទ្ធសាសនាតាមដំណើរគោលចររបស់ព្រះចន្ទដែលរាប់តាមរង្វាស់នៃឆ្នាំចន្ទគតិ ប្រារព្ធឡើងចាប់ពីថ្ងៃ ១រោច ដល់ថ្ងៃ ១៥រោច ខែភទ្របទ ចន្លោះខែកញ្ញា និង ខែតុលា ដែលជាពិធីបុណ្យដែលមានរយៈពេលវែងជាងគេរហូតទៅដល់ ១៥ ថ្ងៃជារៀងរាល់ឆ្នាំ ពិធីបុណ្យភ្ជុំបិណ្ឌ ឬពិធីសែនដូនតា ធ្វើឡើងដើម្បីឧទ្ទិសកុសល ផលបុណ្យ ដល់ដូនតាដែលបានចែកឋានទៅដើម្បីជាកិច្ច តបស្នងសងគុណ និង ជួយរំដោះទុក្ខទោសដល់បុព្វការីជនផងដែរ។ ពិធីបុណ្យនេះបង្រៀនឱ្យកូនចៅជំនាន់ក្រោយគ្រប់រូបចេះ ដឹងគុណ ដឹងកំណើត មានភាពកត្តញ្ញូ ចំពោះមាតាបិតា និង ញាតិកាលទាំង ៧ សន្តាន»៕
