មហាជន ជាពិសេស សិល្បករ សិល្បការិនីក្នុងច្បាស់ជាបានស្គាល់មកហើយនូវ អង្គការសិល្បៈខ្មែរអមតៈ តៈ ដែលជាអង្គការមួយមាននាទីយ៉ាងពេញលេញជាអ្នកផ្តល់មូលនិធិ និង ជាអ្នកជំរុញការពង្រឹងភាពច្នៃប្រតិដ្ឋ និង ការបញ្ចេញមតិតាមរយៈការផ្តល់មូលនិធិជាច្រើនទៅដល់សិល្បករ និង អ្នកដឹកនាំក្នុងវិស័យសិល្បៈ។ ក្នុងនោះ អង្គការខាងលើ មានគោលដៅ ដើម្បីបង្កើតជាប្រព័ន្ធអេកូសិល្បៈមួយ ដែលមានសក្តានុពលល្អសម្រាប់សង្គមកម្ពុជា។
យ៉ាងណាមិញ ថ្មីៗនេះ អង្គការសិល្បៈខ្មែរ អមតៈ បានធ្វើសេចក្តីប្រកាសព័ត៌មានស្តីពី «មូលនិធិដំឡើងស្នាដៃថ្មី ឆ្នាំ ២០២៥» ដើម្បីគាំទ្រដល់សិល្បករ ឯកត្តជន សិល្បករក្រុម ឬសិល្បៈសហគមន៍ ឱ្យដំឡើងស្នាដៃថ្មីក្នុងទម្រង់សិល្បទស្សនីយភាពប្រមាណទឹកប្រាក់ ៥ ពាន់ ដុល្លារ។ ក្នុងនោះ «មូលនិធិដំឡើងស្នាដៃថ្មី ឆ្នាំ ២០២៥» គឺធ្វើឡើងនាឆ្នាំនេះ ក្រោមមូលបទ «វិវត្ត» ដែលសំដៅទៅលើ បរិបទ ឬស្ថានការណ៍ ដែលប្រែប្រួលនៅក្នុងសង្គមកម្ពុជាអស់រយៈពេល ៥០ ឆ្នាំ មកនេះ។
គួរជម្រាបថា មូលនិធិដំឡើងស្នាដៃថ្មី ត្រូវបានបង្កើតឡើងដំបូងនៅឆ្នាំ ២០១៨ ដើម្បីគាំទ្រដល់សិល្បករ ឬ សហគមន៍សិល្បៈឱ្យពួកគាត់មានឱកាសក្នុងការបញ្ចេញភាពច្នៃប្រតិដ្ឋ តាមរយៈការបង្កើតស្នាដៃថ្មី ឬអភិវឌ្ឍស្នាដៃថ្មី ដែលមានស្រាប់នៅក្រោមទម្រង់សិល្បទស្សនីយភាព។ មូលនិធិដំឡើងស្នាដៃថ្មី នឹងអនុញ្ញាតឱ្សិល្បករ ឬ សហគមន៍សិល្បៈ ចែករំលេកអំពីរឿងរ៉ាវ ដែលបំពេញអត្ថន័យទៅនឹងមូលបទ នៃមូលនិធិ មានភាពស៊ីជម្រៅ និង ផ្ដល់ការអប់រំនៅក្នុងសង្គមផងដែរ។
ជាក់ស្តែង នៅឆ្នាំ ២០២៥ នេះ មូលនិធិ ខាងលើនឹងចាប់ផ្តើមបើកការចុះឈ្មោះ ពីសិល្បករ ឬសិល្បៈសហគមន៍ ដែលមានគំនិតតំឡើងស្នាដៃថ្មីចាប់ពីពេលនេះ ដល់ថ្ងៃទី ២៨ ខែមេសា ឆ្នាំ ២០២៥ ខាងមុខនេះ។ ក្នុងនោះដែរ សិល្បករ ឬសិល្បៈសហគមន៍ ក៏អាចចូលរួម «កិច្ចសន្ទនាពីមូលនិធិដំឡើងស្នាដៃថ្មី» បានតាមរយៈអនឡាញ នៅថ្ងៃទី ២៧ ខែមីនា ឆ្នាំ ២០២៥ នេះ ដើម្បីពិភាក្សាព័ត៌មានលំអិតរបស់មូលនិធិ ដំណើរការនៃការដាក់ពាក្យ និង ការចែករំលែកអំពីបទពិសោធរបស់អ្នក ដែលធ្លាប់ទទួលបានមូលនិធិកាលពីពេលកន្លងទៅផងដែរ៕
សូមចុចទីនេះ ដើម្បីដឹងព័ត៌មានលម្អិត៖
សូមចុចទីនេះ ដើម្បីទស្សនាវីដេអូ៖
