មហិច្ឆតាខ្ពស់! ទើបអាយុ ២០ ឆ្នាំ បង្កើតប្រទេស ប្រកាសឯករាជ្យដោយខ្លួនឯង ក្លាយជាប្រធានាធិបតីវ័យក្មេង គ្រប់គ្រងប្រជាជនជិត ៤០០ នាក់

ថ្មីៗនេះ សារព័ត៌មានបរទេសមួយ បានរាយការណ៍ពីបុរសវ័យ ២០ ឆ្នាំជនជាតិអូស្រ្តាលីម្នាក់ ដែលបំពេញក្តីស្រមៃពីក្មេង បង្កើតប្រទេសមួយដោយខ្លួនឯង ហើយប្រកាសខ្លួនជាប្រធានាធិបតី គ្រប់គ្រងទៅលើប្រជាជនជិត ៤០០ នាក់។

តាមព័ត៌មានបានឱ្យដឹងថា បុរសខាងលើនេះ មានឈ្មោះថា Daniel Jackson វ័យ ២០ ឆ្នាំ ជាជនជាតិអូស្រ្តាលី។ កាលពីនៅក្មេង Daniel ចូលចិត្តលេងហ្គេម Roblox ហើយចូលចិត្តកសាងពិភពនិម្មិតជាច្រើននៅក្នុងនោះ ដែលធ្វើ Daniel មានក្តីស្រមៃចង់បង្កើតប្រទេសមួយដោយខ្លួនឯងនៅពិភពខាងក្រៅ។ នៅអាយុ ១៨ ឆ្នាំ Daniel បានបង្កើតរដ្ឋាភិបាល និង គណៈរដ្ឋមន្រ្តីជាផ្លូវ ហើយក៏បានបង្កើតច្បាប់ និង រចនាទង់ជាតិដោយខ្លួនឯងទៀត រួចបានប្រកាសឯករាជ្យនៅថ្ងៃទី ៣០ ខែឧសភា ឆ្នាំ ២០១៩ កន្លងទៅ។

គួរឱ្យដឹងដែរថា ប្រទេសនេះមានឈ្មោះថា សារធាណរដ្ឋសេរី Verdis ( Free Republic of Verdis) ស្ថិតនៅលើតំបន់ព្រៃតូចមួយ មានទំហំ ប្រហែល ១២៥ ហិចតា តាមដងទន្លេ Danube ជាទឹកដីកំពុងមានជម្លោះរវាងប្រទេសក្រូអាត និង ស៊ែប៊ី។ ក្នុងនោះ Daniel និង ប្រជាជនជិត ៤០០ នាក់ បាននាំគ្នាទៅបោះលំនៅនៅលើទឹកដីនោះ តាមការអះអាងសិទ្ធិឯករាជ្យ តែត្រូវអាជ្ញាធរប្រទេសក្រូអាតប្រឆាំង និង និរទេសចេញកាលពីឆ្នាំ ២០២៣ កន្លងទៅ។ ដោយឡែក មកទល់ពេលនេះ សារធាណរដ្ឋសេរី Verdis កំពុងប្រតិបត្តិការជារដ្ឋាភិបាលនិរទេស ហើយសង្ឃឹមថានឹងអាចត្រឡប់ទៅកាន់ទីតាំងលំនៅវិញនៅពេលអនាគត៕

ប្រភព​៖ TOI