ក្រោយពីដុំសាច់ក្នុងខួរក្បាលត្រូវបានដុះឡើងមកវិញក្រោយវះកាត់អស់រយៈពេល ២ ខែ កន្លះ និង មិនអាចបន្តព្យាបាលនៅប្រទេសថៃបាន កុមារា ឆលី មានពន្លឺសង្ឃឹមជាថ្មីហើយ ខណៈក្រុមគ្រួសារបានបញ្ជូន ឆលី ទៅព្យាបាលនៅប្រទេសម៉ាឡេស៊ី។
ក្រោយទៅដល់មន្ទីរពេទ្យនាប្រទេសម៉ាឡេស៊ីហើយនោះ អ្វីដែលកាន់តែរំភើបចិត្តគ្រូពេទ្យបានឱ្យដឹង ឆលី អាចបញ្ចូលកោសិកាដើម្បីព្យាបាលបាន។ ជាក់ស្តែង បើគិតមកដល់ពេលនេះ រយៈពេលប្រមាណជាង ១ ខែមកហើយ ដែល ឆលី បាន និង កំពុងស្នាក់នៅឯប្រទេសម៉ាឡេស៊ី ដើម្បីព្យាបាលបន្ត។
យ៉ាងណាមិញ ក្រោយពីទៅព្យាបាលនៅប្រទេសម៉ាឡេស៊ីមួយរយៈនេះ ឆលី ធ្វើឱ្យអ្នកលេងបណ្តាញសង្គមហ្វេសប៊ុក ដែលតែងអាណិតស្រឡាញ់ ឆលី រីករាយជំនួសគ្រួសារយ៉ាងខ្លាំង ខណៈឃើញ ឆលី មានសាច់ឈាមស្រស់បស់ជាងមុនខ្លាំង និង ឡើងគីឡូវិញហើយ។ ម្យ៉ាងវិញទៀត ក្រឡេកទៅមើលផេកហ្វេសប៊ុកផ្លូវការរបស់ ឆលី ក៏តែងបង្ហាញពីសកម្មភាពរបស់ ឆលី ពោរពេញដោយស្នាមញញឹមដោយក្តីសង្ឃឹម បន្ទាប់ពីពុះពារជាមួយនឹងជំងឺដ៏កាចសាហាវនេះបានបន្តទៀតនោះ៕
