បើនិយាយពីសណ្ឋាគារលំដាប់ផ្កាយ ៥ សាន់ & មូន រីវើសាយ (SUN & MOON, Riverside Hotel) នៅរាជធានីភ្នំពេញ គ្រប់គ្នាភាគច្រើនប្រាកដជាស្គាល់យ៉ាងច្បាស់ តែបើនិយាយពីម្ចាស់សណ្ឋាគារវិញ អាចនឹងមិនសូវមានអ្នកស្គាល់ប៉ុន្មានឡើយ។ ម្ចាស់សណ្ឋាគារនេះគឺ អ្នកឧកញ៉ាបណ្ឌិត ជា រតនា។ ក្រៅពីមានក្រុមហ៊ុនធំ វិនិយោគលើវិស័យបដិណ្ឋារកិច្ច និង វិស័យអចលនទ្រព្យ ជាញឹកញយអ្នកឧកញ៉ាបណ្ឌិតក៏សកម្មនឹងសកម្មភាពសប្បុរសធម៌ជួយដល់សង្គមផងដែរ។
បច្ចុប្បន្ន អ្នកឧកញ៉ាបណ្ឌិត ជា រតនា គឺជាសមាជិកក្រុមប្រឹក្សាភិបាល នៃសមាគមឧកញ៉ាកម្ពុជា និង ជាប្រធានក្រុមប្រឹក្សាភិបាល និង ជាអគ្គនាយក នៃក្រុមហ៊ុន សាន់ & មូន គ្រុប (Sun & Moon Group) ដែលជាក្រុមហ៊ុនវិនិយោគលើវិស័យបដិសណ្ឋារកិច្ច ដែលក្នុងនោះមានសណ្ឋាគារ សាន់ & មូន និង វិស័យអចលនទ្រព្យ ដែលផ្ដោតលើការអភិវឌ្ឍន៍លំនៅឋានឯកជន ដូចជា បុរី ខុនដូ និង អគារអាផាតមិនជាដើម។
លើសពីនេះ អ្នកឧកញ៉ាបណ្ឌិត បានបង្កើត «មូលនិធិសប្បុរសធម៌ អ្នកឧកញ៉ាបណ្ឌិត ជា រតនា និង អ្នកឧកញ៉ា លី ហៀក រតនា» ដើម្បីជួយផ្ដល់ដៃសិប្បនិម្មិត ប្រាក់ឧបត្ថម្ភជីវភាព និង ផ្ដល់ដើមទុនបង្កើតមុខរបរ និង ផ្ដល់អាហារូបករណ៍ដល់ជនពិការដៃទាំងពីរ ដែលរហូតមកដល់ពេលនេះមានសមាជិកជាជនពិការដៃទាំងពីរចំនួនសរុប ២៧៦ នាក់។
អ្នកឧកញ៉ាត្រូវបានរាជរដ្ឋាភិបាលកម្ពុជាទទួលស្គាល់ និង ផ្តល់កិត្តិយសតាមរយៈគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ៕
