នាពេលថ្មីៗនេះ តាមរយៈផេក ជីវចម្រុះនៃប្រទេសកម្ពុជា បានចែករំលែកនូវផ្កាខ្មែរមួយប្រភេទពុំសូវមានអ្នកស្គាល់ ដែលផ្កានេះមានឈ្មោះជាខ្មែរថា កេសរកូល «នាងរំភាយមាស» ជាប្រភេទផ្កាត្រូវបានអ្នកស្រាវជ្រាវរកឃើញនៅភាគខាងលិចប្រទេសកម្ពុជា និង បណ្តាប្រទេសអាស៊ីខាងត្បូង មានចិន ថៃ លាវ ម៉ាឡេស៊ី ភូមា វៀតណាម។
តាមប្រភពបានឱ្យដឹងថា កេសរកូលប្រភេទនេះមានឈ្មោះវិទ្យាសាស្ត្រហៅថា Dendrobium Fimbriatum មានដុះនៅតាមតំបន់ព្រៃសំណើមខ្ពស់ ក្នុងរយៈកម្ពស់ចាប់ពី ៥០០ ម ដល់ ១៥២០ ម ពីនីវូទឹកសមុទ្រ ប៉ុន្តែមានកន្លែងខ្លះអាចមានដុះដល់រយៈកម្ពស់ ២៤០០ ម ជាកេសរកូលផ្ញើប្រាណលើដើមឈើ និង អាចដុះលើថ្មផង លើដីផង ហើយដើមរបស់វាមានកម្ពស់ពី ៦០ សម ដល់ ១២០ សម ពេលខ្លះអាចមានដល់ ១៨០ សម។
ដើមរបស់ «នាងរំភាយមាស» មានលក្ខណៈស្រួចចុង និង ជម្រុះស្លឹកចោលនៅពេលផ្កា ភាគច្រើនវាចេញផ្កានៅខែមិនាដល់ខែមេសា ហើយក្នុងមួយទងមានផ្កាចាប់ពី ៥ ទៅ ១៥ ផ្កា ដែលចេញនៅផ្នែកខាងចុងនៃដើម។ ផ្ការបស់វាមានក្លិនមិនសូវជាក្រអូបទេ ប៉ុន្តែវាក៏បានទាក់ទាញភ្នាក់ងារដំណើរលម្អងដែរ ដូចជា សត្វឃ្មុំ នឹង រុយ ជាដើម៕
ប្រភព ៖ ជីវចម្រុះនៃប្រទេសកម្ពុជា
