មកស្គាល់កាន់ច្បាស់ពីប្រាសាទតាក្របី នៅឧត្តរមានជ័យ មានចម្ងាយប្រមាណត្រឹម ១០ គ.ម ពីប្រាសាទតាមាន់ធំ

ប្រាសាទតាក្របី ជាប្រាសាទខ្មែរដែលមានទីតាំងស្ថិតនៅភូមិឈើស្លាប់ ឃុំគោកខ្ពស់ ស្រុកបន្ទាយអំពិល មានចម្ងាយ ៥៧ គ.ម ពីខេត្តឧត្តរមានជ័យ តាមផ្លូវជាតិលេខ ៥៦ និង មានចម្ងាយ ៣០ គ.ម ពីទីរួមស្រុកបន្ទាយ អំពិល និង មានចម្ងាយប្រមាណ ១០ គ.ម ពីខាងកើតប្រាសាទតាមាន់ធំ។

ប្រាសាទតាក្របី ត្រូវបានសាងសង់ឡើងអំពីថ្មភក់ជាប់ផ្ទាល់ដី ដោយមានគោបុរៈ “ Gopura ” បែរទៅរកទិសទាំងបួនដែលមានទំហំ ៣០មx៣០ម ហើយមានទីតាំងនៅលើជួរភ្នំដងរែក។ ចម្លាក់នៅក្នុង ប្រាសាទនេះ គេបានពិពណ៌នាអំពីព្រះយម “ Yama ” ទ្រង់ជិះក្របី។ ក្នុងនោះបើមើលតាមរយៈសំណង់ស្ថាបត្យកម្ម ប្រាសាទនេះត្រូវបានកសាងឡើងក្នុងសតវត្សទី ១២-១៣ ក្នុងរចនាបថក្រោយអង្គរវត្ត ឬ បាយ័ន្ត។

នៅតួប៉មកណ្តាលនៃប្រាសាទតាក្របី មានតម្កល់លិង្គរបស់ព្រះសីវៈ ហៅថា ស្វ័យម្ភូវលិង្គ “Svayambhuva Linga” មានន័យថាលិង្គ កើតឡើងដោយឯកឯង។ ដូច្នេះប្រាសាទនេះកសាងឡើង ដើម្បីឧទ្ទិសថ្វាយដល់ព្រះសីវៈ ដែលគេប៉ាន់ស្មានថាប្រហែលចាប់ផ្តើមសាងសង់នៅក្នុងសតវត្សទី ១១ ប៉ុន្តែសាងសង់មិនទាន់រួចរាល់ឡើយ ដូចប្រាសាទកែវ នៅខេត្តសៀមរាប៕

ប្រភព ៖ មន្ទីរទេសចរណ៍ ខេត្តឧត្តរមានជ័យ