ក្រោយពីបានបំពេញបេសកកម្មដ៏ធំ នៃដំណើរថ្មើរជើងក្នុងព្រឹត្តិការណ៍សប្បុរធម៌ក្រោមប្រធានបទ «ដើរដោយក្តីសង្ឃឹម ដើរដើម្បីទេសចរណ៍» ជាលើកដំបូងរបស់ខ្លួនចាប់តាំងពីថ្ងៃទី ០៤ ខែកញ្ញា ឆ្នាំ ២០២៥ មកនោះ បវរកញ្ញា កុយ អេនណា បានដល់គោលដៅដោយជោគជ័យហើយលើទឹកដីខេត្តសៀមរាប កាលពីថ្ងៃទី ២២ ខែកញ្ញា ឆ្នាំ ២០២៥ កន្លងទៅ។
ក្នុងនោះដំណើរថ្មើរជើងរយៈពេលប្រមាណ ២០ ថ្ងៃ ឈានមកដល់ទឹកដីខេត្តសៀមរាប កញ្ញា កុយ អេនណា ត្រូវបានបងប្អូនប្រជាពលរដ្ឋ ថ្នាក់ដឹកនាំសំខាន់ៗ បានរង់ចាំទទួលស្វាគមន៍ Queen រូបនេះ យ៉ាងកក់ក្តៅ និង ស័ក្តិសមបំផុតនៃការលះបង់របស់នាង។
ក្នុងនោះ កញ្ញា កុយ អេនណា ត្រូវបានរង់ចាំទទួលស្វាគមន៍ និង អមដំណើរបន្តចូលទៅកាន់ទឹកដីខេត្តសៀមរាបពីសំណាក់ លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី និង ជាសមាជិកក្រុមការងារថ្នាក់ជាតិរបស់រាជរដ្ឋាភិបាលចុះមូលដ្ឋាន ខេត្តសៀមរាប តំណាងដ៏ខ្ពង់ខ្ពស់លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី។ លើសពីនោះ ក៏មានការរង់ចាំទទួលពី លោកជំទាវ សាន់ណារ៉ាឡង់ឌី រដ្ឋលេខាធិការតំណាងរដ្ឋមន្រ្តីក្រសួងវប្បធម៌ និង វិចិត្រសិល្បៈនៅឯបរិវេណប្រាសាទអង្គរវត្តនាម៉ោងប្រមាណជិត ៥ ភ្លឺ ទាំងហាលភ្លៀងថែមទៀតផង។
ដោយឡែក ទន្ទឹមនឹងការទទួលស្វាគមន៍ នៃការមកដល់គោលដៅរបស់កញ្ញា កុយ អេនណា នោះ មហាជនអ្នកលេងបណ្តាញសង្គមហ្វេសប៊ុក ក៏បានចាប់អារម្មណ៍នឹងកំលោះសង្ហាជនជាតិបរទេសមួយរូប ដែលបានអមដំណើរដើរជាមួយកញ្ញា កុយ អេនណា រយៈពេលប្រមាណជិត ១ សប្តាហ៍ដែរ ដែលគេបានដឹងថា កំលោះរូបនោះមានឈ្មោះថា Rezi។
ក្នុងនោះដែរ លោក Rezi បានចូលរួមដើរជាមួយ កញ្ញា កុយ អេនណា ដើម្បីជាការផ្តល់កម្លាំងចិត្ត និង រួមចំណែកនៃការលះបង់ដ៏ធំធេងរបស់ស្ត្រីខ្លាំងរូបនេះថែមទៀតផង ដោយលោក Rezi គឺជាជនជាតិរុស្ស៊ី និង ជាតារាបង្ហាញម៉ូដ ព្រមទាំងជា Influencer ផងដែរ៕
