មកស្គាល់កូនប្រុសច្បង លោកអ្នកឧកញ៉ា ភាព ហៀក ជាពាណិជ្ជករដ៏ឆ្នើមក្នុងចំណោមអ្នកការទូតសេដ្ឋកិច្ចខ្លាំងៗនៅកម្ពុជា

ជាសែស្រឡាយអ្នកជំនួញជួរមុខនៅកម្ពុជា លោកអ្នកឧកញ៉ា លាង ឃុន ត្រូវបានគេស្គាល់ថា ជាកូនប្រុសច្បងរបស់ លោកអ្នកឧកញ៉ា ភាព ហៀក ដែលជាស្ថាបនិកក្រុមហ៊ុន ជីប ម៉ុង គ្រុប ។ អ្នកឧកញ៉ាកើតក្នុង ឆ្នាំ១៩៧២ ហើយលោកបានចូលប្រឡូកក្នុងវិស័យជំនួញតាំងពីដើមទសវត្សរ៍ ១៩៩០ មក។

សព្វថ្ងៃ លោកអ្នកឧកញ៉ា ជាសហស្ថាបនិក និង ជាប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប ដែលជាក្រុមហ៊ុនដ៏ធំមួយនៅក្នុងស្រុក ដែលមានបុត្រសម្ព័ន្ធក្នុងពហុវិស័យរួមមាន៖ ក្រុមហ៊ុនលក់សម្ភារ និង​ ទំនិញ (MFCG), ក្រុមហ៊ុនផលិតចែកចាយស៊ីម៉ងត៍ និង បេតុងលាយស្រេច, ក្រុមហ៊ុនផលិតភេសជ្ជ ទឹកបរិសុទ្ធ និង ស្រាបៀរ, សណ្ឋាគារ, តំបន់កម្សាន្ត, ទីលានវាយកូនហ្គោល, ធនាគារ, ផ្សារទំនើប, វិស័យលក់រាយ, វិស័យសំណង់ និងអចលនទ្រព្យ រួមទាំងរោងចក្រឧស្សាហកម្មផងដែរ។

លោកអ្នកឧកញ៉ា លាង ឃុន ត្រូវបានស្គាល់ថា ជាពាណិជ្ជករដ៏ស្វាហាប់ ជាអ្នកដឹកនាំយុទ្ធសាស្រ្តរបស់ក្រុមហ៊ុន និង ជាអ្នកការទូតសេដ្ឋកិច្ច ព្រមទាំងជាពាណិជ្ជករដ៏ឆ្នើមក្នុងចំណោមអ្នកការទូតសេដ្ឋកិច្ចឆ្នើមៗនៅក្នុងប្រទេសកម្ពុជា។ ភាពជាអ្នកដឹកនាំនេះ បានជំរុញឱ្យ លោកអ្នកឧកញ៉ា លាង ឃុន រួមជាមួយសហស្ថាបនិក និង ថ្នាក់ដឹកនាំដទៃទៀត នៃក្រុមហ៊ុន ជីប ម៉ុង គ្រុប សម្រេចបាននូវសមិទ្ធផលដ៏ធំធេង និង រីកលូតលាស់យ៉ាងឆាប់រហ័ស រហូតក្លាយជាសម្ព័ន្ធក្រុមហ៊ុនដ៏ធំនៅក្នុងប្រទេសកម្ពុជា​ ដោយបានបង្កើតការងាររាប់ម៉ឺនកន្លែងសម្រាប់ប្រជាជនកម្ពុជា។

ទន្ទឹមនឹងនេះ លោកអ្នកឧកញ៉ា លាង ឃុន និង ក្រុមហ៊ុន ជីព ម៉ុង គ្រុប ក៏បានចូលរួមយ៉ាងសកម្មជាមួយសកម្មភាពសង្គម និង សកម្មភាពមនុស្សធម៌ជាច្រើនពាក់ព័ន្ធទៅនឹងវិស័យសង្គមកិច្ច អប់រំ សុខាភិបាល ពោលគឺទាំងក្នុងផ្នែកអាណាចក្រ និង ពុទ្ធចក្រ។ ហេតុនេះហើយទើប លោកអ្នកឧកញ៉ា ត្រូវបានទទួលស្គាល់ពីរាជរដ្ឋាភិបាលកម្ពុជាតាមរយៈការផ្តល់ជូននូវគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ។

លើសពីនេះ នៅសមាគមឧកញ៉ាកម្ពុជា លោកអ្នកឧកញ៉ា លាង ឃុន មានតួនាទីជាអនុប្រធានសមាគមផងដែរ៕

ប្រភព៖ Cambodian Oknha Association