នៅរសៀលថ្ងៃទី ២៦ ខែសីហា ឆ្នាំ ២០២៥ នេះ រដ្ឋបាលខេត្តបន្ទាយមានជ័យ បានជូនដំណឹងឱ្យបានដឹងថា ពាក់ព័ន្ធទៅនឹងការហាមឃាត់មិនអនុញ្ញាតឱ្យមានផ្សាយផ្ទាល់ (Live) នៅតំបន់ដែលយោធាថៃរាយបន្លាលួស នៅបន្ទាត់ព្រំដែន ពិសេសនៅចំណុចភូមិជោគជ័យ និង ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយសារកន្លងទៅមានសាព័ត៌មាន ក៏ដូចជាក្រុមមួយក្តាប់តូច បានធ្វើការផ្សាយផ្ទាល់ បញ្ឆេះកំហឹងរឿងបញ្ហាព្រំដែន ដែលនាំឱ្យបញ្ហាកាន់តែពិបាកក្នុងការដោះស្រាយ។
រដ្ឋបាលខេត្ត បានបន្តថា ៖ «ក្នុងនោះក៏បានយកការផ្សាយរបស់ក្រសួងការពារជាតិ ត្រឹមតែមួយជ្រុងមកបំភាន់ខ្លឹមសាររួម ៖ «ក្រសួងការពារជាតិបានផ្សាយថា សភាពការណ៍មានភាពស្ងប់ស្ងាត់នៅតាមព្រំដែន…… តែប្រជាជនបង្ហោះថា កំពុងប៉ះទង្គិចជាមួយទាហានថៃ រឿងពង្រាយបន្លាលួសចូលមកដីប្រជាជន……. សាធារណជន «មិនដឹងត្រូវជឿខាងណា?» ។
ហេតុដូច្នេះ រដ្ឋបាលខេត្ត បានសូមឱ្យបងប្អូនសារព័ត៌មាន និង សាធារណជនមេត្តាជ្រាប និង យោគយល់ដោយក្តីអនុគ្រោះ៕
