បើរំឭកដល់ក្រុមគ្រួសារ អ្នកល្បីៗនៅក្នុងវិស័យសិល្បៈកាលពីប្រមាណជាង ៣០ ឆ្នាំ មុន មហាជនជាច្រើនច្បាស់ជានៅចងចាំក្រុមគ្រួសារ ត្រកូល ឈិន ដែលបច្ចុប្បន្ន មានទាយាទសិល្បៈចុងក្រោយកំពុងបន្តលើវិថីសិល្បៈ និង ទទួលបានប្រជាប្រិយភាព គឺកញ្ញា ឈិន មុន្នីនាថ។
ក្នុងនោះ បើរំឭកពីជីវិតសិល្បៈរបស់គ្រួសារត្រកូល ឈិន ដែលមានលោក ឈិន កុសល ជាឪពុក, អ្នកនាង ឈិន សុធារី និង កញ្ញា ឈិន រីយ៉ា ជាម្តាយមីង របស់កញ្ញា ឈិន មុន្នីនាថ ឯណោះវិញ ច្បាស់ជាមានមហាជនមួយចំនួន នៅចងចាំពីដំណើរសិល្បៈរបស់ក្រុមគ្រួសារខាងលើជាក់ជាមិនខាន។
យ៉ាងណាក៏ដោយ បច្ចុប្បន្ន អ្នកនាង ឈិន សុធារី និង កញ្ញា ឈិន រីយ៉ា ក៏មិនបានបន្តអាជីពលើវិថីសិល្បៈដូចមុនឡើយ ដោយម្នាក់ៗកំពុងបន្តអាជីពរៀងៗខ្លួន។ រីឯ លោក ឈិន កុសល ក៏បានបង្ហាញវត្តមានម្តងម្កាលលើឆាកតន្ត្រី ដោយបច្ចុប្បន្នមានតែកញ្ញា ឈិន មុន្នីនាថ ម្នាក់ ដែលកំពុងសកម្មលើវិថីសិល្បៈមួយនេះ ហើយក៏កំពុងទទួលបានការគាំទ្រយ៉ាងច្រើនពីមហាជនផងដែរ៕
