ភ្លាវម្នាក់ទៀតហើយ! អតីតមន្ត្រីថៃម្នាក់ស្នើឱ្យរដ្ឋមន្រ្តីក្រសួងវប្បធម៌ ជួសជុលប្រាសាទតាមាន់តូច តាមាន់ធំ និង តាក្របី ហើយសង់របងព័ទ្ធដើម្បីលក់សំបុត្រចូលទស្សនា

ថ្មីៗនេះ លោក Somchai Srisutthiyakorn ដែលជាអតីតគណៈកម្មាធិការរៀបចំការបោះឆ្នោត បានស្នើទៅដល់លោកស្រី Paethontarn ដែលបានឡើងកាន់ដំណែងជារដ្ឋមន្រ្តីក្រសួងវប្បធម៌ ឱ្យយកចិត្តប្រជាជនតាមរយៈការជួលជុល និង សងរបងព័ទ្ធប្រាសាទតាមាន់តូច តាមាន់ធំ និង តាក្របី ព្រមទាំងយកលុយចំពោះអ្នកចូលទៅទស្សនា។

លោក Somchai Srisutthiyakorn បានបង្ហាញការយល់ឃើញនេះនៅតាមបណ្តាញសង្គម ដោយហៅវាថាជាលការបង្កើតស្នាដៃតាមយុទ្ធសាស្រ្ត Quick Win ងាយនឹងឱ្យលោកស្រី Paethongtarn យកចិត្តប្រជាជនបានមកវិញ។ ក្នុងនោះលោកបានណែនាំថា ៖

១. ជួលជុលប្រាសាទទាំងអស់របស់ថៃ ជាពិសេសគឺប្រាសាទដែលនៅជាប់ព្រំដែនកម្ពុជា-ថៃ ដែលនៅក្រោមការគ្រប់គ្រងរបស់នាយកដ្ឋានវិចិត្រសិល្បៈ ក្រសួងវប្បធម៌ ជាដើម មានដូចជាប្រាសាទតាមាន់ធំ តាក្របី និង តាមាន់តូច។

២. ជួសជុលដោយប្រើប្រាស់ថវិការបស់ក្រសួង ហើយបើសិនជាមិនគ្រប់គ្រាន់អាចសុំថវិកាកណ្តាលមកពីនាយករដ្ឋមន្រ្តីស្តីទី ដើម្បីកសាងរបងជុំវិញប្រាសាទ ដែលជាទឹកដីថៃជាបន្ទាន់ បើនៅតែមិនគ្រាន់ទៀត អាចសុំការបរិច្ចាគពីប្រជាជនថៃ។

៣. មើលថែប្រាសាទឱ្យបានល្អជាប់លាប់ ដោយយកថ្លៃចូលទស្សនា ២០ បាត ចំពោះជនជាតិថៃ និង ២០០ បាត ចំពោះជនបរទេស ចំណែកជនចាស់ជរាឱ្យចូលដោយមិនគិតថ្លៃ។

៤. មានវិធានការការពារនៃការសុវត្ថិភាពនៅប្រាសាទ ដូចជាការឆែកឆេរអាវុធ ការហាមមិនឱ្យបង្កសំឡេងរំខាន ឬ ហាមមិនឱ្យមានការប្រមូលផ្តុំជួបជុំនៅប្រាសាទក្នុងចេតនានយោបាយ។

ផ្អែកលើយុទ្ធសាស្រ្តទាំងនេះ លោក Somchai Srisutthiyakorn ជឿថាការកសាងស្នាដៃពិតជាងាយណាស់ ប្រជាជននឹងពេញចិត្តទូទាំងប្រទេស ហើយការស្ទង់មតិលើកក្រោយប្រជាប្រិយភាពនឹងស្ទុះឡើងតែម្តង៕

ប្រភព៖ CH7