ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស អ្នកធ្លាប់តាមដានពីជីវិតឯកជនរបស់តារាភាពយន្តជើងចាស់ លោក ជា សំណាង មានការភ្ញាក់ផ្អើលយ៉ាងខ្លាំង ខណៈបានឃើញវត្តមានរបស់ភរិយារបស់លោក គឺអ្នកនាង រិទ្ធ ទិព្ធពិសិដ្ឋរាសី បានទម្លាយពីចំណងអាពាហ៍ពិពាហ៍បែបបាក់នៅក្នុងកម្មវិធីមួយ។
ក្នុងនោះដែរ អ្នកនាង រិទ្ធ ទិព្ធពិសិដ្ឋរាសី អតីតភរិយា លោក ជា សំណាង ដែលត្រូវបានគេស្គាល់ថា ជាតារាសម្តែង និង តារាបង្ហាញម៉ូដមួយរូបនោះ បានលេចវត្តមានក្នុងការប្រកួតកម្មវិធីសម្រស់មួយ និង បានឱ្យដឹងថា អ្នកនាង និង អតីតស្វាមី បានលែងលះគ្នាហើយ។
លើសពីនោះ អ្វីដែលគួរឱ្យភ្ញាក់ផ្អើល អ្នកនាង រិទ្ធ ទិព្ធពិសិដ្ឋរាសី បានជម្រាបថា អ្នកនាង ធ្លាប់ព្យាយាមសម្លាប់ខ្លួនឯងដល់ទៅ ២ ដង ក៏ព្រោះបញ្ហាផ្លូវចិត្ត ប៉ុន្តែពេលនេះ អ្នកនាង បានយកឈ្នះ និង វិលត្រឡប់មកកាន់សិល្បៈវិញ ដើម្បីបង្ហាញភាពរឹងមាំរបស់ខ្លួនឯង ជាពិសេសនោះ គឺជាគំរូសម្រាប់កូនៗ។
គួររំឭកថា តារាភាពយន្តជើងចាស់ លោក ជា សំណាង និង អតីតភរិយា គឺតារាបង្ហាញម៉ូដ អ្នកនាង រិទ្ធ ទិព្ធពិសិដ្ឋរាសី បានចាប់ដៃគ្នារៀបការកាលពីអំឡុងខែវិច្ឆិកា ឆ្នាំ ២០១៩។ ក្នុងចំណងអាពាហ៍ពិពាហ៍ អ្នកសិល្បៈមួយគូនេះ ក៏ទទួលបានចំណងដៃកូនប្រុសស្រីចំនួន ២ នាក់ហើយ ប៉ុន្តែការបែកបាក់គ្នានៅអំឡុងពេលណា ក៏អតីតស្វាមីភរិយាគូនេះ មិនបានទម្លាយជាសាធារណៈនោះដែរ៕
