ប្រទេសអ៊ីស្លង់ គឺជាប្រទេសមួយដែលមិនមានវត្តមានសត្វមូសរស់នៅឡើយ ព្រោះតែកត្តាសីតុណ្ហភាពដ៏ត្រជាក់ខ្លាំង ប៉ុន្តែថ្មីៗនេះអ្វីដែលគួរឱ្យភ្ញាក់ផ្អើលនោះ គឺ វិទ្យាស្ថានប្រវត្តិសាស្រ្តធម្មជាតិអ៊ីស្លង់ បានបញ្ជាក់ឱ្យដឹងថា គេបានឃើញវត្តមានសត្វមូសមួយក្បាលដំបូងនៅក្នុងប្រទេសនេះហើយ។
សារព័ត៌មាន Anadolu Ajansi បានទម្លាយឱ្យដឹងថា វិទ្យាស្ថាន Icelandic Institute of Natural History បានរកឃើញសត្វមូសប្រភេទ Culiseta annulata នៅក្នុងតំបន់សហគមន៍មួយនៅក្នុងប្រទេស ដោយវាគឺជាប្រភេទសត្វមូសដែលធន់នឹងកម្តៅត្រជាក់បានទៀតផង ហើយភាគច្រើនគេប្រទះឃើញទូទៅនៅតំបន់អឺរ៉ុបប៉ែកខាងជើង។
យ៉ាងណាមិញ អ្នកវិទ្យាសាស្ត្រជាច្រើនបានជឿថា វត្តមានរបស់សត្វមូសនៅក្នុងប្រទេសត្រជាក់បែបនេះ អាចជាសញ្ញាព្រមានពីការប្រែប្រួលអាកាសធាតុ ដែលធ្វើឱ្យសីតុណ្ហភាពជាមធ្យមរបស់ប្រទេសអ៊ីស្លង់កាន់តែក្តៅ និងមានសំណើម ដែលកត្តាឱ្យការបង្កកំណើតរបស់សត្វមូសប្រភេទនេះកាន់តែងាយស្រួលឡើង៕
ប្រភព៖ SCMP
