ថ្មីៗនេះ មានការសិក្សាស្រាវជ្រាវមួយពីអ្នកជំនាញចិត្តសាស្រ្តនៅសកលវិទ្យាល័យ UC Riverside ក្នុងសហរដ្ឋអាមេរិក បានបង្ហាញថាការនិយាយដើមអ្នកដទៃជាមួយនឹងសង្សារ អាចជួយឱ្យទំនាក់ទំនងស្នេហាកាន់តែស្អិតល្មួតឡើង។
តាមព័ត៌មានបានឱ្យដឹងថា ការសិក្សានេះមានគូស្នេហ៍ចំនួន ៧៦ គូ មានទាំងភេទផ្ទុយគ្នា និង ភេទដូចគ្នានៅរដ្ឋកាលីហ្វ័រញ៉ាបានចូលរួម ដោយពួកគេបានពាក់ឧបករណ៍ថតសំឡេងចល័ត ដើម្បីថតទុកការសន្ទនាពេញមួយថ្ងៃ។ ក្នុងនោះ ពួកគេបានប្រើពេលប្រមាណ ២៨ នាទីក្នុងមួយថ្ងៃ ក្នុងការនិយាយដើមអ្នកដទៃឱ្យគ្នាស្តាប់ ហើយលទ្ធផលគឺធ្វើឱ្យពួកគេកាន់តែមានក្តីសុខស្អិតល្មួត ទំនាក់ទំនងក៏ល្អជាងមុន ជាពិសេសគឺគូស្នេហ៍ដែលជាស្រ្តីភេទដូចគ្នា។
យ៉ាងណាមិញ អ្នកស្រាវជ្រាវបានឱ្យដឹងថា ការនិយាយដើមគេជាមួយនឹងគូស្នេហ៍ គឺជាការតភ្ជាប់ផ្នែកអារម្មណ៍រវាងគ្នា និង គ្នា ហើយវាជួយបង្កើនអារម្មណ៍ស្និទ្ធស្នាល ព្រមទាំងជឿជាក់ឱ្យគូស្នេហ៍។ ដោយឡែក ការនិយាយដើមមិនមែនសុទ្ធតែរឿងអវិជ្ជមានទាំងអស់ទេ ពោលគឺជាការនិយាយអំពីនរណាម្នាក់ក្នុងបែបល្អ បែបធម្មតា ឬ បែបអវិជ្ជមានក៏បាន៕
ប្រភព៖ Khaosod
