មួយរយៈធំមកហើយ ដែលបវរកញ្ញាដ៏មានឥទ្ធិពល រឿន ណាត បានលាមាតុភូមិកម្ពុជា ទៅរស់នៅទឹកដីប្រាក់ដុល្លារ សហរដ្ឋអាមេរិក។ ដូចប្រិយមិត្តភាគច្រើនបានជ្រាបរួចហើយថា រឿន ណាត មិនបានចាកចេញទៅតែម្នាក់ឯងនោះទេ គឺអ្នកនាងបានទៅជាមួយលោក លាវ វេងហួរ ហើយពួកគេក៏បានរៀបការតាមបែបបច្ចឹមប្រទេសនៅទីនោះតែម្ដងកាលពីថ្ងៃទី ៩ ខែឧសភា ឆ្នាំ ២០២៥។
បន្ទាប់ពីរៀបការ រឿន ណាត និង ស្វាមី បានបន្តរស់នៅសហរដ្ឋអាមេរិក មិននឹកនាត្រលប់មកប្រឡូកសិល្បៈនៅមាតុប្រទេសវិញនោះទេ ដោយជារឿយៗគូស្វាមីភរិយាថ្មីថ្មោងមួយគូនេះ តែងបង្ហាញសកម្មភាពផ្អែមល្ហែម និង ជីវភាពរស់នៅក្រៅប្រទេសយ៉ាងសាមញ្ញ តែពោរពេញដោយភាពកក់ក្ដៅ និង មានសេចក្ដីសុខបំផុត។
កន្លងមក រឿន ណាត ធ្លាប់បានបង្ហោះនៅលើផេកផ្លូវការរបស់នាងថា ពេលនេះនាងលែងត្រូវការភាពល្បីល្បាញទៀតហើយ នាងគ្រាន់តែចង់រស់នៅស្ងប់ស្ងាត់ មានជីវភាពសាមញ្ញមួយជាមួយស្វាមីប៉ុណ្ណោះ។ ការបង្ហោះរបស់តារាស្រីរូបនេះ បានធ្វើឱ្យមហាជនអ្នកគាំទ្រជាច្រើនយល់ថា រឿន ណាត ទំនងជាលែងខ្វល់ខ្វាយចូលសិល្បៈវិញទៀតហើយ ព្រោះថាពេលនេះនាងកំពុងមានជីវិតដ៏សាមញ្ញមានសុភមង្គលយ៉ាងពេញលេងមួយហើយ៕
