លិបលៗច្រើនឆ្នាំ ហាក់ រីខត បាត់មុខពីវិថីសិល្បៈជាថ្មី សូម្បីទំនាក់ទំនងលើបណ្ដាញសង្គមក៏ស្ងាត់ឈឹង

ស្នាមដៃបទចម្រៀងល្បីៗជាច្រើនដែលតារាចម្រៀងប្រុសរូបសង្ហា ហាក់ រីខត បានផលិត និង ត្រូវបានមហាជនអ្នកគាំទ្រផ្ទុះការស្រឡាញ់ពេញចិត្ត ដូចជាបទ «មេឃកំពុងភ្លៀងហើយ» បទ «ស្ដាយមួយជីវិត» បទ «អូនកុំយំណា» ព្រមទាំងមានស្នាដៃជាច្រើនទៀតដែលលោកនិពន្ធឱ្យតារាល្បីៗច្រៀង ដែលសុទ្ធសឹងតែជាបទចម្រៀងផ្ទុះការគាំទ្រខ្លាំង។

បន្ទាប់ពីសាងស្នាដៃ និង កេរ្ដិ៍ឈ្មោះក្ដោបបានប្រជាប្រិយភាពពីមហាជនជាច្រើនហើយនោះ ហាក់ រីខត ស្រាប់តែផ្ដាច់ខ្លួនឃ្លាតឆ្ងាយពីវិថីសិល្បៈអស់ជាច្រើនឆ្នាំ ដោយកាលនោះលោកក៏ធ្លាប់បានបង្ហើបថា ការបាត់មុខរបស់លោកគឺបណ្ដាលមកពីបញ្ហាផ្ទាល់ខ្លួនមួយចំនួន ហើយក្រោយមកខ្ទង់ប្រមាណជា ១ ឆ្នាំមុន ហាក់ រីខត បានត្រលប់មកបង្ហាញខ្លួនប្រឡូកវិថីសិល្បៈជាថ្មី ដែលធ្វើឱ្យអ្នកគាំទ្ររីករាយយ៉ាងខ្លាំង។

យ៉ាងណាមិញ ការវិលត្រលប់របស់តារាចម្រៀងប្រុសរូបនេះ មិនយូរប៉ុន្មាន លោកក៏ហាក់ស្ងប់ស្ងាត់ទៅវិញ លែងបញ្ចេញបទចម្រៀងថ្មីៗបម្រើអារម្មណ៍អ្នកគាំទ្រ ហើយបច្ចុប្បន្នសូម្បីតែការបង្ហាញមុខនៅលើបណ្ដាញសង្គមហ្វេសប៊ុក Tiktok ឬ IG ក៏អ្នកគាំទ្រកម្របានឃើញ ហាក់ រីខត បង្ហោះរូបដែរ៕