ព្រោះតែរឿងដាក់ឈ្មោះឱ្យកូន ប្តីប្រពន្ធចិនមួយគូឈ្លោះគ្នាដល់ថ្នាក់ឡើងតុលាការប្ដឹងលែងលះ

ថ្មីៗនេះ មានរឿងរ៉ាវដ៏គួរឱ្យហួសចិត្តមួយ ដោយប្តីប្រពន្ធមួយគូនៅសៀងហៃ ប្រទេសចិន ចម្រូងចម្រាស់គ្នាខ្លាំងដល់ថ្នាក់ឡើងតុលាការដើម្បីលែងលះ ព្រោះតែរឿងដណ្តើមគ្នាដាក់ឈ្មោះឱ្យកូន។

តាមព័ត៌មានបានឱ្យដឹងថា គូប្តីប្រពន្ធនេះបានចុះអេតាស៊ីវិលនៅក្នុងឆ្នាំ ២០២៣ ហើយពួកគេក៏ទទួលបានកូនប្រុសម្នាក់ជាចំណងដៃនៅក្នុងឆ្នាំ ២០២៤ កន្លងទៅ។ យ៉ាងណាមិញ នៅពេលដែលកូនប្រុសបានកើតហើយ ទាំងពីរនាក់ប្តីប្រពន្ធបានព្យាយាមទៅធ្វើសំបុត្រកំណើតឱ្យកូនរៀងៗខ្លួន ដោយចង់ដាក់ឈ្មោះកូនទៅតាមឈ្មោះដែលខ្លួនចង់បាន ដោយមិនពិភាក្សាគ្នារើសឈ្មោះកូនជាមួយគ្នាឡើយ តែក៏ត្រូវខាងអាជ្ញាធរបដិសេធ។

ដោយឡែក មកទល់ពេលនេះកូនប្រុសមានអាយុ ១ ឆ្នាំហើយ តែនៅមិនទាន់មានសំបុត្រកំណើតនោះទេ ធ្វើឱ្យគេមិនបានទទួលបាន​ការចាក់វ៉ាក់សាំងគ្រប់គ្រាន់ឡើយ ហើយចំណែកឪពុកម្តាយវិញ ក៏កំពុងតែចម្រូងចម្រាស់គ្នាជាមួយនឹងរឿងឈ្មោះនេះ រហូតដល់ឡើងតុលាការដើម្បីលែងលះទៀតផង។ យ៉ាងណាមិញ តុលាការបានដាស់តឿនទៅឪពុកម្តាយទាក់ទងនឹងការរំលោភសិទ្ធិកុមារ ហើយក៏បានដាក់កំណត់ឱ្យអ្នកទាំងពីរធ្វើសំបុត្រកំណើតឱ្យកូនឱ្យទាន់ពេលវេលាផងដែរ៕

ប្រភព៖ Khaosod