ច្រើនឆ្នាំមកហើយដែលម្ចាស់បទ «សុំឈឺមួយថ្ងៃបានហើយ» លោក Seyha ha បានបន្សាត់ខ្លួនឃ្លាតឆ្ងាយពីវិស័យចម្រៀង ហើយបើទោះបីជាក្នុងរយៈពេលចុងក្រោយនេះ លោកបានប្រកាសវិលត្រលប់មកផលិតបទចម្រៀងបម្រើជូនអារម្មណ៍ទស្សនិកជនឡើងវិញ តែយ៉ាងណាការផលិតចម្រៀងរបស់លោក ក៏មិនបានច្រើន និង ផ្ទុះនៅក្នុងស្រទាប់យុវវ័យដូចកាលពីខ្ទង់ ១០ ឆ្នាំមុនដែរ។
បើនិយាយថា លោក Seyha ha ផ្ដាច់ខ្លួនចេញពីវិស័យចម្រៀងទាំងស្រុងក៏មិនមែន ព្រោះថាខ្ទង់មួយឆ្នាំមុន លោកបានវិលមកផលិតចម្រៀងឡើងវិញ ហើយក្រោយៗមក លោកក៏ចាប់ផ្ដើមមានទីផ្សារ និង ចាប់ផ្ដើមត្រលប់ទៅកាន់ក្បាលម៉ៃក្រូបង្ហើរសំឡេងនៅតាមឆាកតន្រ្តីនានា ជាមួយនឹងទឹកដមសំឡេងពីរោះដូចកាលពីមុនដដែល។
ងាកមកជីវិតឯកជនរបស់ Seyha ha វិញ បច្ចុប្បន្នលោកនៅតែបន្តទំនាក់ទំនងយ៉ាងផ្អែមល្ហែមជាមួយគូស្នេហ៍ជាទីស្រឡាញ់ឈ្មោះ Doris Roland ដែលជាតារាម៉ូដែលជនជាតិបារាំង ហើយអ្នកទាំងពីរបានទាក់ទងមើលចិត្តគ្នាច្រើនឆ្នាំហើយ ពោលគឺចាប់តាំងពី Doris មករស់នៅ និង ធ្វើការនៅប្រទេសកម្ពុជាយើងថ្មីៗម្ល៉េះ។
ស្នេហាបែបចាស់ទុំរវាងតារាចម្រៀង Seyha ha និង មិត្តស្រីសញ្ជាតិបារាំង បានឈានដល់ការស្គាល់ចាស់ទុំហើយ ធ្វើឱ្យមហាជនអ្នកគាំទ្ររង់ចាំស្ដាប់ដំណឹងល្អរបស់អ្នកទាំងពីរឆាប់ៗ៕
