ពេទ្យធ្មេញម្នាក់នៅអាមេរិក ត្រូវប៉ូលិសចាប់ខ្លួន ក្រោយប្រើកាវបិទធ្មេញដាក់ឱ្យអតិថិជន

មានករណីដ៏គួរឱ្យហួសចិត្តមួយនៅសហរដ្ឋអាមេរិក ដែលពេទ្យធ្មេញម្នាក់ត្រូវប៉ូលិសចាប់ខ្លួន ក្រោយពីនាងបានប្រើកាវស្អិតទៅបិទដាក់ធ្មេញឱ្យអតិថិជន។

តាមព័ត៌មានបានឱ្យដឹងថា ស្រ្តីខាងលើនេះមានឈ្មោះ Emelie Martinez  វ័យ ៣៥ ឆ្នាំ ជាអ្នករស់នៅរដ្ឋ Florida។ នាងបានអះអាងថាខ្លួនគឺជាពេទ្យធ្មេញ ហើយបានផ្សព្វផ្សាយពីការបិទធ្មេញ Veneer នៅក្នុងតម្លៃថោកជាងតម្លៃធម្មតា។ ក្នុងនោះ មានអតិជនជាច្រើនបានចាប់អារម្មណ៍ពីការផ្សព្វផ្សាយរបស់នាង ហើយបានមកទទួលសេវាកម្ម តែនាងមិនបានប្រើប្រាស់ឧបករណ៍ស្របតាមបច្ចេកទេសពេទ្យធ្មេញនោះទេ ដោយនាងបែរជាប្រើកាវ Super Glue បិទឱ្យអតិជន រហូតដល់ម្នាក់ៗខូចធ្មេញធ្ងន់ធ្ងរ មានទាំងខូចធ្មេញទាំងស្រុង​ ឆ្លងមេរោគក្នុងមាត់ ហើយអ្នកខ្លះត្រូវវះកាត់ថែមទៀតផង។

យ៉ាងណាមិញ ចុងក្រោយនាងត្រូវបានប៉ូលិសឃាត់ខ្លួនពីបទផ្តល់សេវាកម្មធ្មេញខុសច្បាប់ ដោយគ្មានអាជ្ញាប័ណ្ណត្រឹមត្រូវ។ ជាពិសេសនោះ នេះមិនមែនជាលើកទីមួយនោះទេដែលនាងបានប្រព្រឹត្តបែបនេះ ពោលគឺការពីខែមីនាកន្លងទៅ នាងក៏ធ្លាប់ប្រទះបញ្ហាផ្លូវច្បាប់ទាក់ទងនឹងករណីនេះដូចគ្នា៕

ប្រភព៖ Khaosod