ទីក្រុងមួយនៅជប៉ុន ត្រៀមចេញច្បាប់កំណត់ឱ្យប្រជាជនលេងទូរស័ព្ទបានត្រឹមតែ ២ ម៉ោងក្នុងមួយថ្ងៃ

ថ្មីៗនេះ ទីក្រុង Toyoake ខេត្ត Aichi ប្រទេសជប៉ុន កំពុងតែពិចារណាក្នុងការចេញច្បាប់ថ្មីនៅក្នុងតំបន់របស់ខ្លួន ដែលជាការកំណត់ឱ្យប្រជាជនលេងទូរស័ព្ទបានត្រឹមតែ ២ ម៉ោងក្នុងមួយថ្ងៃ ដើម្បីការពារថែរក្សាសុខភាពរបស់ពួកគេ។

តាមព័ត៌មានបានឱ្យដឹងថា ក្រុមប្រឹក្សាក្រុង Toyoake បានជំរុញ និង ស្នើឱ្យប្រជាជនកាត់បន្ថយការប្រើប្រាស់ទូរស័ព្ទមកត្រឹមតែ ២ ម៉ោងក្នុងមួយថ្ងៃ ដោយកំណត់ថាប្រើពេលណាក៏ប្រើចុះឱ្យតែប្រើត្រឹម ២ ម៉ោង ហើយក្មេងអាយុពី ៦ ទៅ ១២ ឆ្នាំ គួរតែឈប់លែងត្រឹមម៉ោង ៩ យប់ រីឯមនុស្សពេញវ័យគួរតែឈប់ត្រឹមម៉ោង ១០ យប់។

គោលដៅនៃការគំនិតនេះ គឺដើម្បីកាត់បន្ថយផលប៉ះពាល់អវិជ្ជមានលើសុខភាពផ្លូវកាយ និង ផ្លូវចិត្ត ដោយសារតែការប្រើប្រាស់គ្រឿងអេឡិចត្រូនិចច្រើនពេក និង ធ្វើឱ្យការគេងកាន់តែមានប្រសិទ្ធភាព ជាពិសេសគឺកាត់បន្ថយការគេចម៉ោងរៀនរបស់ក្មេងៗ។ ដោយឡែក អភិបាលក្រុង Toyoake បានឱ្យដឹងថា ការស្នើនេះមិនស្របទៅតាមច្បាប់នោះទេ ហើយក៏មិនមែនជាការបិទសិទ្ធិ ប៉ុន្តែគ្រាន់តែការជំរុញ និង លើកទឹកចិត្តឱ្យប្រជាជនពិចារណាក្នុងការប្រើប្រាស់ទូរស័ព្ទឱ្យបានត្រឹមត្រូវ៕

ប្រភព៖ Khaosod